Грчкиот премиер Киријакос Мицотакис најави дека патниците на крстарење ќе платат 20 евра за да ги посетат островите Миконос и Санторини на неколку часа во екот на туристичката сезона.
Мицотакис на традиционалната прес-конференција во рамките на меѓународниот саем во Солун рече дека Грција нема структурен проблем со прекумерниот туризам и дека целта не е доаѓањето туристи, туку приходите од туризмот.
„Би сакале повеќе туристи, кои трошат повеќе пари“, рече тој, додавајќи дека прекумерниот туризам на одредени дестинации создава проблем неколку недели или месеци во годината, пишуваат грчките медиуми.
Мерките ќе бидат донесени следната недела.
Подеднакво е важно да се спречи голем број бродови да пристигнуваат на одредена дестинација во исто време, додаде тој.
Мицотакис нагласи дека од друга страна, „многу е опасно Грција да се претставува како земја непријателски настроена кон туризмот“.
„Едно е да се укаже на постојните слабости, а друго е да се набљудува и претставува Грција во странство како земја која не е гостопримлива за туристите. Затоа што ова последното не е точно“, рече грчкиот премиер.