Според теоријата на Гери Чепмен, познатиот американски брачен советник, писател и водител, постојат 5 основни јазици на љубовта кои ги зборуваме и кои ги препознаваме кај другите.
Тој го именува концептот на љубовен јазик во својата книга „5 Love Languages: The Secret of Lasting Love“ во која опишува 5 уникатни стилови на изразување љубов врз основа на неговата долгогодишна работа со парови.
Откривањето на вашиот примарен љубовен јазик и редовното изразување може да создаде подобра комуникација и разбирање меѓу партнерите, да се поддржуваат едни со други и да се изгради силна и стабилна врска. Ова се 5-те јазици на љубовта.
Зборови кои охрабруваат
Луѓето кои го зборуваат овој јазик сакаат да добиваат вербална поддршка, охрабрување и пофалби од нивните партнери. Само физичката блискост не им е доволна, но во партнерот наоѓаат поддршка и некој во чие расудување имаат доверба, па затоа им е важно да добијат потврда за нивната вредност.
Зборовите понекогаш имаат посилно влијание од конкретните постапки. Ако вашиот партнер спаѓа во оваа категорија, размислете добро за работите што ги кажувате. Користете ги зборовите како алатка за поддршка, а не како критика.
Квалитетно поминато време
Во овој случај, партнерот треба да ве вклучи во активностите што сака да ги прави. Нему му е исклучително важно времето што го поминувате заедно. Има можности за продлабочување на врската преку квалитетен разговор. Оддалечете се од технологијата и дружете се. Само тоа е доволно за вашиот партнер.
Давање и примање подароци
Еден од јазиците преку кој партнерот се чувствува сакан е примањето барем симболични подароци кои се доживуваат како израз на љубов. Тоа не значи дека треба да потрошите многу пари на партнерот. Подароците можат да бидат мали знаци на внимание. Вашиот партнер не е материјалист, туку некој кој убавината ја наоѓа во малите гестови.
Пружање помош
Овој љубовен јазик се однесува на изразување љубов преку конкретни постапки или услуги кои го олеснуваат животот на саканата личност. Ова може да вклучува помагање во домашните работи или други обврски.
Сепак, не треба се да се сведува на обврски. Секој има различно толкување за тоа што му претставува овој јазик, па најдобро е директно да го прашате партнерот како можете да му помогнете и што му треба.
Физички контакт
Во овој случај, партнерот става голем акцент на физичката блискост. Допирање, гушкање и размена на нежности. Ова е можеби наједноставниот јазик бидејќи бара само физичко присуство со кое партнерот се чувствува безбедно.
Неодамнешните истражувања покажаа дека компатибилноста на паровите со јазикот на љубовта не мора да значи успешна и среќна врска. Паровите кои делеле ист љубовен јазик не биле поисполнети од паровите кои имале различни стилови. Многу е важно да го знаеме јазикот на нашиот партнер, да го запознаеме и разбереме.