Американскиот рапер последниве месеци беше во центарот на скандал, по серијата обвинувања за силување.
Агентите на американското Министерство за домашна безбедност отворија истрага против хип-хоп ѕвездата Шон Комбс, попознат како Пи Диди, и го пребараа неговиот имот во Лос Анџелес и областа Мајами.
Истрагата ја водат федерални агенти од Њујорк, каде што поранешната девојка во ноември поднела тужба против Комбс пред федералниот суд, обвинувајќи го за вмешаност во трговија со луѓе со цел сексуална експлоатација.
Комбс (54) тврди дека е невин и дека зад ваквите тужби стои желбата да се добијат „брзи пари“.
Телевизиските станици во Лос Анџелес објавија воздушни снимки на кои се гледа како федералните агенти го пребаруваат раскошниот имот на Комбс во луксузната населба Холмби Хилс во градот. Медиумите објавија дека се приведени неколку лица, но не е јасно дали некој е уапсен.