Со доаѓањето на пролетта, не само што природата се буди од зимскиот сон, туку и човечките срца почнуваат да чукаат поинтензивно, обземени од чувства кои многумина ги припишуваат на магијата на новиот почеток. Меѓутоа, како што објаснуваат психолозите, основата на овие пролетни емоции всушност лежи во науката, поточно во хемијата.
Потоплите денови, повеќе дневна светлина и будењето на природата неминовно влијаат на нашето расположение и емоции. Психолозите наведуваат дека заљубувањето во пролет е феномен на кој можеме да се заблагодариме на зголемувањето на дневната светлина. Оваа промена директно влијае на нашите хормони – го намалува лачењето на мелатонин, познат и како хормон за спиење и го зголемува серотонинот, хормонот одговорен за доброто расположение. Овие хормонални промени доведуваат до зајакнување на социјалните врски и полесно воспоставување на емоционални врски.
Дополнително, потоплото време нè поттикнува да поминуваме повеќе време надвор, во туѓо друштво, што дополнително ја поттикнува социјалната интеракција и создава поволна атмосфера за развој на нови љубовни приказни. Според психолозите, пролетта не е само метафорична сезона на љубовта – тоа е време кога хемиските реакции во нашиот мозок буквално ги поттикнуваат чувствата на привлечност и поврзаност.
Крвта што побрзо тече во вените, „пеперутките во стомакот“ и еуфоричната состојба што многумина ја доживуваат со доаѓањето на пролетта, не се само плод на нашата фантазија. Тоа е резултат на природни процеси, врз основа на начинот на кој нашето тело и ум реагираат на промените во околината. Пролетта, значи, не е само сезона на цветање на природата, туку и време кога цветаат нови љубовни чувства, поддржани од светлината што не опкружува.
Затоа, додека уживате во првите пролетни денови и чувствувате дека срцето ви чука побрзо при помислата на нова љубов, запомнете – за ова можеме да им се заблагодариме не само на поетските метафори, туку и на многу реалните хемиски реакции што се случуваат во нашето тело.