Кога се одлучувате за фризурата што ќе ја имате, најважен е вашиот животен стил и вкус. Но, една формула исто така може да помогне. Експертите на брендот за нега на коса Џон Фрида го смислија „правилото 5,5 см“ за кое велат дека помага да се пресмета оптималната фризура за обликот на вашето лице. Тоа е удобен и забавен начин да се види што велат бројките. Ќе ви помогне ако отсекогаш сте сакале кратка фризура, но се плашите дека можеби нема да ви одговара или ако секогаш сте имале пократка коса и сте расположени да ја оставите да расте, пишува магазинот „Гламур“.
Што е „правилото 5,5 см“?
Според експертите од брендот Џон Фрида, формулата го пресметува растојанието помеѓу брадата и ушната школка, со цел да се утврди дали повеќе ви одговара долгата или кратката коса. Доколку измерената должина е помала од 5,5 см, експертите велат дека ќе ви одговара кратка фризура. Од друга страна, ако растојанието е поголемо од 5,5, повеќе ќе ви одговара подолга коса.
Како правилно да се измери?
Застанете пред огледало. Земете молив и ставете го хоризонтално под брадата. Земете го линијарот и поставете го под прав агол на моливот и турнете го до нивото на ушната школка. Измерете го растојанието од увото до брадата, вертикално надолу. Секако, математичката формула не е пресудна за изборот на фризура, но можеби може да помогне во донесувањето одлука. Водете сметка за обликот на лицето, како и за текстурата на косата, кои играат важна улога во изборот на совршената фризура. Една од најважните работи е да ја одржувате вашата коса негувана и секогаш чиста, бидејќи тоа придонесува за целокупниот впечаток.