Американската актерка Сигурни Вивер е добитник на почесниот „Златен лав“ на 81. филмски фестивал во Венеција, соопштија денеска организаторите.
„Познатата американска актерка и трикратна номинирана за Оскар Сигурни Вивер беше наградена со Златен лав за животно дело на 81. Меѓународен филмски фестивал во Венеција“, се вели во соопштението на официјалната веб-страница на фестивалот.
Одлуката ја донесе Одборот на Венециското биенале, кој го прифати предлогот на директорот на фестивалот Алберт Барбера.
– Актерка од калибарот на Сигури Вивер има малку ривали. Зајакната со нејзиното значајно театарско образование, таа освои голема публика со филмот „Осмиот патник“, во режија на Ридли Скот, кој набрзо стана симбол на 1980-тите. Во текот на таа деценија, таа создаде имиџ на невидена хероина во жанрот на акционите филмови, способна победнички да се натпреварува со машките модели кои дотогаш доминираа во епските и авантуристичките филмови – изјави Барбера.
Според него, актерката постојано ја „провоцирала“ својата личност преку избори кои се движеле од жанровски филмови до комедии, уметнички филмови и филмови за деца.
– Како автентичен соработник, а не само флексибилен инструмент во рацете на режисерот, таа придонесе за успехот на филмовите на Џејмс Камерон, Пол Шрејдер, Питер Веир, Мајкл Аптед, Роман Полански, Иван Рајтман, Мајк Николс, Анг Ли, и многу други, секој пат наметнувајќи знак на сложена личност – понекогаш контрадикторна, но секогаш автентична – со сопственото харизматично присуство – додаде директорот на Фестивалот.
Сигурни Вивер стекна светска слава по улогата на Елен Рипли во филмовите „Осмиот патник“, а оваа улога и донесе многу награди, меѓу кои и номинација за Оскар.
Три пати беше номинирана за Оскар (1987 година, двапати во 1989 година). Таа ги освои наградите Златен глобус (1989 – двапати), БАФТА (1998) и Сатурн (1987, 2010).
Најстариот филмски фестивал ќе се одржи во Венеција од 28 август до 7 септември.