Недостатокот на магнезиум е чест, и покрај фактот што овој минерал се наоѓа во многу намирници како риба, млеко, јаткасти плодови и лиснат зелен зеленчук.
Познат е по тоа што ја регулира работата на мускулите, но всушност има некои други важни улоги во човечкото тело. Имено, ја регулира функцијата на нервите, нивото на шеќер во крвта, крвниот притисок и ја зголемува енергијата.
Недоволното внесување на магнезиум може да го зголеми ризикот од дијабетес, хипертензија, кардиоваскуларни болести, остеопороза и други болести. Затоа, лекарот за акутна нега на „NHS“, Кишан Витлани наведе четири предупредувачки симптоми кои укажуваат на недостаток на магнезиум, пишува „Mirror“.
Губење на апетит
Губењето на апетитот може да укажува на различни здравствени проблеми како стрес, дигестивни проблеми, но може да биде и резултат на недостаток на магнезиум. Доколку почувствувате гадење и повраќање во комбинација со губење на апетит, важно е да го проверите нивото на магнезиум, бидејќи повраќањето ќе придонесе за губење на овој минерал, како и за дехидрација.
Мускулни грчења или грчеви
Мускулни грчења се меѓу најчестите знаци на недостаток на магнезиум. Додека грчењето може да биде поврзано со замор или премногу кофеин, магнезиумот исто така може да биде фактор. Научниците веруваат дека овие симптоми се предизвикани од поголем проток на калциум, кој ги стимулира мускулите.
Чувство на слабост и вкочанетост
Чувството на физичка слабост и вкочанетост е уште еден симптом на недостаток на магнезиум. Ниското ниво на магнезиум влијае на повеќе телесни процеси, вклучително и нервно сигнализирање и нивоа на калиум во мускулните клетки, што може да предизвика замор и слабост. Заморот и слабоста сами по себе не се нужно знак за недостаток на магнезиум, но во комбинација со други симптоми може да укажуваат на ниско ниво на магнезиум.
Проблеми со менталното здравје
Недостатокот на магнезиум може да доведе до проблеми со менталното здравје. Луѓето кои имаат пониски нивоа на магнезиум може да се чувствуваат вознемирени повеќе од вообичаено. Некои истражувања сугерираат врска помеѓу ниското ниво на магнезиум и депресијата.