Пет години по завршувањето на шоуто, „Suits“ се враќа. Хит серијата, чие снимање започна во 2011 година, наскоро ќе добие рестартирање, но не во Њујорк, туку во сончевиот Лос Анџелес. Љубителите на оваа правна драма најмногу ги воодушеви враќањето на главниот лик од оригиналната серија – харизматичниот Харви Спектер, кој го игра Габриел Махт.
Веста за враќањето во екипата на шоуто ја објави на социјалните мрежи, но не во класичен стил, туку со видео каде ги покажа деталите за манжетните и чевлите со иницијали Х.С. преку кој фановите веднаш сфатија за што се работи. „Кога на некој стар пријател му треба помош… време е да се погрижиме за работите и да ги исправиме истите тие „работи““, рекол Махт под видеото, мислејќи на првата песна на оригиналната серија „Greenback Boogie“.
Имено, потврдено е дека Махт ќе се појави во три епизоди од првата сезона на спин-оф серијата подготвена од NBC. Новата серија наречена „Suits L.A.“ ќе се фокусира на Тед Блек, кој го игра Стивен Амел, поранешен њујоршки обвинител кој основал адвокатска фирма во Лос Анџелес специјализирана за криминални и шоубиз случаи. Потврдата дека серијата добива продолжение дојде во октомври минатата година, од креаторот на серијата, Арон Корш.
„Suits“ заврши во 2019 година со Харви и неговата сопруга Дона, играна од Сара Раферти, кои се преселиле во Сиетл да работат со Мајк Рос, кој го игра Патрик Џеј Адамс и Рејчел Зејн, која ја игра Меган Маркл. Адамс и Маркл претходно ја напуштија серијата, а Махт се појави во сите 134 епизоди од деветте сезони на драмата. Кога серијата се појави на Нетфликс во 2023 година, таа беше на врвот на топ листите неколку недели и на крајот надмина 45 милијарди минути на Нетфликс и Пикок заедно. Масовното оживување на правната драма го натера Махт повторно да се појави со неговите колеги Адамс, Раферти и Џина Торес на Златните глобуси овој јануари. Адамс и Раферти, исто така, моментално се домаќини на подкаст за повторно гледање на „Suits“.
Патрик Џеј Адамс, исто така, изрази интерес да ја повтори својата улога, објави Дедлајн. Што се однесува до тоа дали ќе се појават други членови на оригиналната екипа, вклучувајќи ја и Меган Маркл, тоа допрва треба да се утврди. Маркл седум сезони ја играше практиканката Рејчел Зејн, пред да стане член на кралското семејство. Враќањето на екраните за Рејчел не е целосно исклучено, бидејќи војвотката неочекувано се врати на актерството откако го напушти кралското семејство. Во декември 2023 година, таа глумеше во реклама, а неодамна потпиша договор со глобалната агенција за таленти WME.