„Wednesday“ се враќа на Нетфликс по тригодишна пауза, а критичарите велат дека чекањето вредеше, бидејќи втората сезона доби подобри критики од првата.
Втората сезона, која премиерно се прикажа денес (6 август), а вториот дел ќе биде достапен на 3 септември, доби претежно позитивни критики на „Rotten Tomatoes“. Првата половина од втората сезона моментално има рејтинг од 86 проценти, во споредба со само 73 проценти за првата сезона, која заврши на 23 ноември 2022 година.
Според критичарите, новите епизоди се „вкусно изопачени“ и „невероjaтно пријатни“.
Џена Ортега се враќа за втората сезона како Венсдеј Адамс, девојка со психички моќи, додека се соочува со нови непријатели и застрашувачка мистерија во Академијата „Невермор“. Серијата на Нетфликс е создадена од Алфред Гоф и Мајлс Милар, врз основа на иконските ликови на Чарлс Адамс, а е продуцирана и режирана од Тим Бартон.
Разновидната екипа ги вклучува Исак Ордоњез како Пагсли Адамс, Луис Гузман како Гомез Адамс и Кетрин Зета-Џонс како Мортиша Адамс, плус новодојденците Стив Бушеми како директор Бери Дорт, Кристофер Лојд како професор Орлоф, Џоан Ламли како баба Хестер Фрумп и Лејди Гага како Розалин Ротвуд.
Вики Џесоп (London Evening Standard) со воодушевување вели: „Најновата верзија на Тим Бартон е сè уште вкусно перверзна и се голта како лажица отровен шеќер. Нешто што предизвикува толку зависност не може да биде добро за нас, но секогаш ќе се враќаме за повеќе“.
„Речиси тригодишното чекање би ја уништило полоша серија“, почнува Ед Пауер (Daily Telegraph), „но неверојатно пријатната втора сезона докажува дека вредеше да се чека“. Арамиде Тинубу (Variety) се согласува, пишувајќи: „Полна со ентузијазам и длабочина, сезоната останува возбудлива како и првата“.
Првата сезона на „Wednesday“ доби 12 номинации за наградата „Еми“ во 2023 година, освојувајќи четири: за најдобра оригинална музика, најдобра современа костимографија за серија, најдобра сценографија за современа програма и најдобра современа шминка (непротетска).