Ресторанот Street Burger во центарот на Лондон, кој е дел од синџирот во сопственост на познатиот готвач Гордон Ремзи, неодамна беше затворен.
Иако затворањето се поврзува со бројни негативни критики, не е јасно дали тие се главната причина за затворањето на ресторанот.
Гостите со месеци изразуваа незадоволство поради лошата храна, лошата услуга и превисоките цени, а ресторанот имаше оценка од само 3,5 на TripAdvisor во моментот на затворањето. Од вкупно 226 критики, 76 го оцениле ресторанот како „лош“ или „страшен“.
Еден посетител напиша: „Ова е дефинитивно најлошото место на кое сум бил. Од моментот кога пристигнавме, персоналот беше рамнодушен, па дури и лут што мораа да не услужат. Беа бавни, незаинтересирани и груби, дури и кога баравме нешто едноставно како чаша вода. Храната беше прескапа. Избегнувајте го ова место ако сакате пријатна ноќ надвор.“
Друг посетител изјавил: „Лош вкус, лоша услуга, лоша големина на порциите, лоша цена, лошо сè“.
„Отидов со внукот по плескавица. Имавме две обични плескавици со помфрит и плативме по 18 фунти (околу 22 евра). Тоа е премногу“, додаде друг незадоволен гостин.
Гордон Ремзи не го коментираше затворањето на ресторанот, ниту пак причините зад тоа. Овој ресторан не е единствениот што се затворил во текот на неговата кариера.
На пример, Maze во лондонскиот Мејфер се затвори во 2018 година поради загуби од над три милиони евра, додека негативните критики доведоа до затворање на неговиот ресторан во лондонскиот хотел Клариџ една година порано.
Ремзи често е критикуван за високите цени на храната во неговите ресторани.