Конзервираната храна како грав или туна може да содржи опасни бактерии кои можат да предизвикаат парализа, па дури и смрт, предупредува експертот за хигиена Пол Џексон. Имено, многу конзервирани производи кои со години ги чуваме во оставата, може да бидат загадени со опасни бактерии, меѓу кои и Clostridium botulinum, бактерија која произведува токсини кои го напаѓаат нервниот систем и може да предизвикаат фатална парализа.
Пол Џексон од британската компанија за управување со отпад NRC советува дека конзервите секогаш треба внимателно да се проверуваат пред да се купат.
„Конзервираната храна со мали вдлабнатини е генерално безбедна ако нема други знаци на оштетување“, изјави тој за Mirror. „Но, длабоките вдлабнатини се сериозен предупредувачки знак“.
Имено, ваквите вдлабнатини можат да предизвикаат микропукнатини преку кои бактериите можат да навлезат во конзервата и да ја контаминираат содржината. Самите бактерии можеби не се опасни, но во средина без кислород, како што е затворена конзерва, тие произведуваат многу токсични материи. Ако некое лице јаде таква храна, може да развие ботулизам, состојба која предизвикува тешки невролошки симптоми и парализа.
Симптомите вклучуваат гадење, повраќање, абдоминална болка, дијареа или запек. Ако не се лекува, болеста се шири на нервниот систем, мозокот и ‘рбетниот мозок, предизвикувајќи опаѓачка парализа од глава до пети, според британската Национална здравствена служба. Други симптоми може да вклучуваат овенати очни капаци, заматен или двоен вид, слабост на мускулите на лицето, отежнато дишење и голтање. Се проценува дека смртта се јавува во околу 10 проценти од случаите.
Покрај вдлабнатините, Џексон предупредува и за ‘рѓосани лименки, дури и ако рѓата изгледа безопасно.
„Рѓата може да го ослаби металот и да предизвика истекување на содржината или влегување на воздух, што ја отвора вратата за бактериите“, објаснува тој. „Дури и малата ‘рѓа може да значи дека храната повеќе не е безбедна за јадење.
Надуените лименки се уште еден јасен знак за проблем.
„Ова обично се должи на гасови произведени од бактерии, што значи дека храната е расипана. Таквите лименки треба веднаш да се фрлат“.
Како да чувате конзервирана храна?
Џексон советува и конзервите од кои истекува течност кога се отвораат или имаат непријатен мирис веднаш да се фрлат.
„Истекувањето течност може да значи акумулација на гасови поради растот на микроорганизмите. Покрај губењето на вкусот и квалитетот на храната, тоа може да биде и сериозна закана за здравјето“.
Конзервираната храна најдобро се чува подалеку од мијалникот или изворите на влага и топлина, каде што има температурни промени кои ги фаворизираат бактериите.
„Екстремно ниските температури може да предизвикаат пукање на конзервата, дозволувајќи им на воздухот и влагата да навлезат и да промовираат рѓосување и расипување“, додава Џексон. „Најдобро е конзервите да се чуваат на суво и умерено топло место“.
Исто така, важно е да се следи рокот на употреба, во зависност од видот на храната. Храната со висока содржина на киселини, како што се доматите, може да го одржи квалитетот до 18 месеци по истекот на рокот. Храната како месото и зеленчукот може да биде безбедна до пет години доколку се складира правилно.