Иако појадокот често се опишува како најважен оброк во денот, тоа е оброк што луѓето најчесто го прескокнуваат.
Некои го прескокнуваат поради недостаток на време или апетит наутро, додека други веруваат дека прескокнувањето на појадокот ќе им помогне да ослабат.
Сепак, многу луѓе пијат само една шолја кафе наутро на празен стомак, што може да има штетно влијание врз нивното здравје.
Нутриционист-терапевт Алекса Абударам предупредува дека пиењето кафе пред појадок може негативно да влијае на метаболизмот.
„Ова може да го подигне нивото на кортизол, да доведе до нерамнотежа на шеќерот во крвта и зголемен стрес во телото, што со текот на времето го забавува метаболизмот“, објаснува таа за Парад.
Тaa, исто така, предупредува дека оваа навика може да доведе до зголемување на телесната тежина, особено во пределот на стомакот и ја зголемува желбата за јаглехидрати и шеќер.
Нутриционистот Миранда Галати додава дека прескокнувањето на појадокот често води до лоши одлуки за јадење подоцна во текот на денот: „Ако предолго го одложувате појадокот, вашето тело ќе бара енергија кога конечно ќе почнете да јадете“.
Абударам исто така истакнува дека оваа навика може да ја забави тироидната жлезда, да го ослабне имунолошкиот систем и да го зголеми ризикот од зголемување на телесната тежина и губење на мускулите.
За поддршка на здрав метаболизам, експертите препорачуваат појадок кој содржи протеини и здрави масти.
„Протеините помагаат во поправка на мускулите, а здравите масти го поддржуваат производството на хормони и апсорпцијата на хранливи материи“, вели Абударам. Таа исто така додава дека појадокот пред кафе помага во намалувањето на скоковите на кортизолот.