La Maison Heller, хотел дизајниран од архитектот и дизајнер Филип Старк, ги отвори вратите минатата недела – една деценија откако проектот беше првпат најавен.
Повеќе од десет години по објавувањето, хотелот конечно е отворен. Дизајниран е од Филип Старк, кој го опишува како „уметничко дело во кое може да се живее“. Ова е првиот хотел инспириран од поетската и надреалистичка приказна „La Vie Minutieuse de Manfred Heller“. Романот ги следи авантурите на Манфред, измислен лик кој наследува куќа од своите родители, пишува RTL.
Куќата е инспирирана од вилата Саломон, изградена во 1904 година на авенијата Фох во Мец. Денес, реплика на таа вила се наоѓа на впечатлива деветкатна монолитна зграда, во која е сместен хотел, препознатлив по својата иновативна архитектура и исклучителен дизајн.
Овој хотел со четири ѕвезди има 104 соби и апартмани, распоредени помеѓу вториот и осмиот кат. На приземјето се наоѓа ресторанот La Cuisine de Rose, украсен со џиновски оригами авион кој виси од таванот и фотографии од необични изуми кои потсетуваат на замислената работилница на Манфред.
View this post on Instagram
Вториот ресторан во хотелот, La Maison de Manfred, се наоѓа на деветтиот кат и нуди прекрасен поглед на Центарот Помпиду и областа на амфитеатрите. Внатрешноста потсетува на топлината на семејната трпезарија, со предмети кои изгледаат како да се извлечени од кабинетот на куриозитети.
И двата ресторани ги нагласуваат локалните и сезонските производи, а цените на собите се движат од 170 до 393 евра за ноќевање.