Педро Паскал е еден од најбараните актери во Холивуд денес, познат по своите улоги во серии како „The Mandalorian“, „The Last of Us“, „Narcos“ и „Game of Thrones“, како и во филмот „Gladiator II“. Сепак, неговиот пат до успехот не бил лесен.
Паскал е роден во Сантијаго, главниот град на Чиле, од Вероника Паскал и Хозе Балмаседа, кои во тоа време биле студенти. Кога Педро имал само девет месеци, семејството било принудено да го напушти Чиле и да побара политички азил поради политичка репресија од страна на режимот на генералот Аугусто Пиноче. Прво нашле засолниште во Данска, а потоа се преселиле во Соединетите Држави.
За време на неговото појавување како водител на емисијата „Saturday Night Live“, Паскал се потсетил на своето семејство и тешката одлука што ја донеле: „Моите родители беа храбри. Ја напуштија земјата и нè доведоа мене и сестра ми во Соединетите Држави. Без нив, немаше да бидам тука, ниту пак ќе стоев на сцената на SNL вечерва“.
Иако се обидуваа да изградат нов живот, трагедија го погоди Паскал во 2000 година, кога неговата мајка изврши самоубиство. Во тој момент, Педро имал 24 години. Неговите родители се вратиле во Чиле во 1995 година, каде што ги одгледале своите помлади деца. По смртта на неговата мајка, Педро брзо се вратил во Сантијаго за да присуствува на комеморацијата.
Исто така, во периодот кога тагата била најинтензивна, Паскал се надевал дека ќе добие улога во серијата „Dark Angel“, што можело да му ја отвори вратата кон филмската кариера, но не ја поминал аудицијата. Во интервју за Vanity Fair, тој признал: „Мислите дека неуспехот на аудицијата може да ме скрши? Не може, бидејќи веќе сум скршен“.
Потоа живеел во Лос Анџелес, но сметал дека градот не му нуди простор да се справи со тагата, па се вратил во Њујорк, каде што претходно студирал глума на Уметничкото училиште Тиш на Универзитетот во Њујорк.
Во февруари 2023 година, на годишнината од смртта на неговата мајка, Паскал го направил своето деби како водител на „Saturday Night Live“. По успешната емисија, тој прославил со пријатели, вклучувајќи ја и актерката Сара Полсон, која ја опишала вечерта како пресвртен момент во неговиот живот.
„Беше ноќ во која не сакавме да заврши. Да беше камерата насочена кон мене, ќе видевте човек чиј живот штотуку започнуваше. Беше присутен, полн со енергија, а дури и не беше свесен колку добро му оди. Со оглед на годишнината од смртта на неговата мајка и неговата кариера, се чувствуваше како ново раѓање“, рече Полсон.
Паскал додаде дека таа вечер го почувствувал силното присуство на неговата мајка: „Чувствував дека е таму. Не знам како да го објаснам, но таа ноќ целосно ја промени мојата перспектива за таа годишнина. Тоа беше целосна трансформација на тажно сеќавање.“