Обожаватели од сите возрасти низ целиот свет се подготвуваат за турнејата на Oasis, која не можеа ни да ја замислат до неодамна. До првиот настап во Кардиф има само еден ден.
За постарите обожаватели кои присуствуваа на концертите на Oasis за време на нивниот врв во 1990-тите, турнејата е шанса да ги оживеат спомените од „старите добри времиња“. Од друга страна, помладата публика никогаш не сонувала дека, по познатата караница на браќата Галагер – една од најбурните во музиката – некогаш ќе имаат можност да ги видат на сцената заедно.
Мет, 25-годишен софтверски инженер од Лидс, пораснал слушајќи го својот татко како му раскажува за легендарните настапи на Лиам и Ноел Галагер. Шансите да ги види во живо за него биле „далечна фантазија“ до сега.
Тој успеа да добие билети за долгоочекуваниот концерт во Манчестер, родниот град на бендот, закажан за 11 јули.
„Не само што ќе бидат возбудени што се враќаат во Манчестер, туку и фановите и локалното население ќе бидат воодушевени да ги пречекаат назад“, изјави Мет за АФП.
Лорен де Бруин, 23-годишна девојка од Хемел Хемпстед, северозападно од Лондон, вели дека го сака бритпопот затоа што тоа е музиката што нејзината мајка ја слушала како тинејџерка.
„Имам многу убави спомени од таа музика, особено од Оејзис“, рече таа.
Но, таа не можеше да добие билети во хистеријата што следеше по најавата на браќата Галагер за повторно обединување по 15 години разделба.
Оејзис ја започнуваат својата турнеја во главниот град на Велс во петок. Тоа е еден од 17-те распродадени концерти во Велика Британија, по што следат низа концерти во САД, Јапонија, Австралија и Аргентина.
Платформата за продажба на билети Ticketmaster продаде повеќе од 900.000 билети, но концертите предизвикаа и негодување поради вртоглавото зголемување на цените, познати како „динамични“ цени, предизвикани од големата побарувачка.
„Веќе го видов најдобриот дел, ова е бонус“, рече Сем Инглиш, 47-годишник од Норвич, кој го гледал бендот четири пати пред нивното распаѓање во 2009 година.
„Мислам дека многу мажи на средна возраст како мене ќе се вратат во минатото“, рече Инглиш, кој ќе присуствува на концертите во Манчестер и Лос Анџелес.
Во времето на бендот, дрскиот стил и хедонизмот на браќата Галагер беа синоним за британска „машка“ субкултура прифатена од млади мажи и фудбалски фанови.
Три децении подоцна, некои од најстрасните обожаватели на бендот се млади девојки кои ги споделуваат видеата и објавите на браќата на TikTok и X.
„Онлајн обожавателите се претежно млади девојки“, вели 16-годишната Лиз Марина Нумбела Насименто од Рио де Жанеиро, која не знае како бендот станал толку популарен кај „девојките“.
За помладите обожаватели како Насименто, кои ќе го видат бендот во Сао Паоло во ноември, повторното обединување на Oasis „значи враќање на музиката“.
„Конечно ќе го доживееме она за што слушаме веќе една деценија“, вели таа возбудено.
За многумина, трајната привлечност на бендот лежи во нивните заразни, оптимистични мелодии, носталгичен културен момент и приказната за нивниот подем од работничката класа.
„Немало ништо слично долго време“, рече Инглиш. Нивната најпозната песна, „Wonderwall“, стана првата песна од 1990-тите што надмина една милијарда преслушувања на Spotify во 2020 година.
Помладите слушатели можеа да ја откријат нивната музика со тоа што присуствуваа на одделните концерти на Лиам и Ноел.
Мет, кој ги гледал двата концерта поединечно, рече дека „другата половина недостасува“.
„Се чувствува како да гледате 50 проценти од Oasis“, рече тој.
Популарноста на бендот меѓу генерациите, исто така, предизвика поделба меѓу фановите.
„Замислете да чекате 15 години Oasis да се обединат, а потоа да бидете распродадени поради 21-годишната Клое од Стокпорт која само сака да го слушне „Wonderwall“ во живо“, напиша корисникот на X, Били Коркоран, минатиот август.
Лиам Галагер рече дека турнејата е „за сите – млади и стари“.
Инглиш го дели тоа чувство, нарекувајќи го генерацискиот јаз „смешен“. Сепак, тој признава дека барем едно нешто ќе ги раздели генерациите – нема да го вади телефонот за да го снима концертот. „Апсолутно не. Ништо од тоа“, рече тој.