По огромниот успех на хит-филмот „Wicked“, Universal Studios го објави првиот официјален трејлер за неговото продолжение.
„Wicked: For Good“ носи емотивно и визуелно раскошно враќање во Смарагдниот град, а трејлерот предизвика големо возбудување кај фановите ширум светот.
Wicked: For Good е вториот дел од дводелната адаптација на бродвејскиот мјузикл со исто име и ја продолжува приказната таму каде што застана првиот филм.
Откако Елфаба (Синтија Ериво) е прогласена за „Зла вештерка“ и бега од Оз, Глинда (Аријана Гранде) ја добива титулата Добра вештерка на Северот. Трејлерот сугерира дека нивното пријателство ќе продолжи да биде тестирано.
Во филмот се појавуваат и Џонатан Бејли како Фијеро, Мишел Јео како Мадам Морибл, Џеф Голдблум како Волшебникот од Оз, Итан Слејтер како Бок, Мариса Боде како сестрата на Елфаба, Несароуз Троп, и Бовен Јанг како Пфани.
Режисерот Џон М. Чу, кој го режираше и првиот филм, повторно соработува со сценаристите Вини Холцман и Дана Фокс, а сценариото вклучува настани од вториот чин на бродвејската претстава и ќе покаже што се случило кога Дороти дошла во Оз.
Првиот трејлер за „Wicked: For Good“ веднаш наиде на многу позитивни реакции, а обожавателите повторно го изразија своето воодушевување од хемијата меѓу Ериво и Гранде.
Првиот филм, прикажан во ноември 2024 година, беше неверојатен успех. Заработи дури 756 милиони долари низ целиот свет, што го прави најуспешната адаптација на бродвејски мјузикл во историјата и третиот најуспешен филм на студиото „Universal“.
Филмот доби 10 номинации за Оскар, вклучувајќи најдобар филм, главна женска улога (Ериво), споредна женска улога (Гранде), костимографија, монтажа, шминка, продукциски дизајн, оригинална музика, звук и визуелни ефекти. Тој освои Оскари за костимографија и продукциски дизајн, а Пол Тејзвел стана првиот Афроамериканец кој освои Оскар за најдобар костимографски дизајн.
Филмот „Wicked: For Good“ доаѓа во кината на 21 ноември оваа година.