Белградската полиција истражува експлозивна направа фрлена рано утрово во вилата на познатиот пејач Здравко Чолиќ (74), кој моментално се наоѓа во Загреб. Иако веднаш се појавија информации за сериозни оштетувања на фасадата и возилата, истражителите ја разгледуваат можноста Чолиќ да не бил вистинската цел на нападот.
Детали за експлозијата и штетата
Експлозијата ја оштети фасадата и масивната ограда на вилата, а шрапнелите погодија и неколку луксузни автомобили во дворот. Соседите ја опишаа детонацијата како моќна и вознемирувачка, додека алармните системи за возила преку улицата беа активирани поради силата на ударот.
Српските медиуми јавуваат дека истражителите веруваат дека напаѓачот можеби ја таргетирал една од блиските вили. Меѓу можните кандидати за цел се споменува поранешниот менаџер на Чолиќ, Адис Гојак, кој живее во куќата веднаш до него, пишува Telegraf.rs. Полицијата ги проверува камерите за надзор и податоците од базните станици за мобилни телефони за да утврди која била вистинската цел.
Чолиќ се јави од Загреб
Здравко Чолиќ изјави дека моментално е во Загреб и работи на нов албум и дека сите се добро. „Го разбирам интересот на медиумите, но важно е информациите да се дистрибуираат одговорно и да се проверат. Чекаме полициски извештај“, рече пејачoт.
Првата соседка на пејачот изјави дека детонацијата била толку моќна што сите на улицата биле исплашени. Нејзината куќа не била оштетена, но таа ја опиша сцената како шокантна и ужасна.