Холивудскиот актер Џек Блек неодамна го откри своето најголемо жалење во кариерата.
Во интервју за Capital FM, 56-годишниот актер одговори на прашање за улогата за која најмногу жали што ја одбил.
„Тоа е незгодно прашање бидејќи тогаш лицето кое ја добило улогата ќе помисли: „Ох, јас бев вториот избор? Бев полош од него““, рече Блек.
Еден од водителите, Џордан Норт, рече дека никогаш не размислувал за тоа и никогаш повеќе нема да го постави тоа прашање, а потоа Блек се пошегува дека сепак ќе одговори бидејќи не му е гајле.
„Ми беше понудена улогата и жалам што реков не. Ми беше понудена улогата на Синдром во еден фантастичен филм „The Incredibles“, кој е еден од моите омилени филмови на сите времиња, патем. Реков не затоа што си помислив: „Ах, режисерот Бред Берд? Никогаш не сум слушнал за него““, рече Блек.
На актерот првично не му се допаднала улогата кога првпат го прочитал сценариото и мислел дека е „еднодимензионална“.
„Научив вредна лекција бидејќи кога излезе тој филм, беше еден од најдобрите филмови некогаш направени. Помислив: „Зошто ми беше толку тешко?““, рече ѕвездата.
Станува збор за анимиран филм од 2004 година, а ликот Синдром на крајот го позајми гласот на Џејсон Ли. Во филмот се појавуваат и гласовите на Холи Хантер, Сара Вовел, Спенсер Фокс, Семјуел Л. Џексон и Елизабет Пења.
„The Incredibles“ беше огромен успех, заработувајќи над 630 милиони долари на кино благајните и добивајќи широко признание од критиката. Продолжението беше објавено во 2018 година.