Моделите генерирани со вештачка интелигенција сè почесто се појавуваат во рекламите и на социјалните мрежи, покренувајќи прашања за нивното влијание врз начинот на кој луѓето го доживуваат сопствениот изглед. Вештачката интелигенција создава речиси совршени поединци кои не постојат во реалноста, што го отежнува разликувањето на таквата содржина од реалноста.
Миа Перумал, 19-годишна студентка на Универзитетот во Кардиф која се изборила со пореметување во исхраната, стравува дека развојот на оваа технологија би можел дополнително да им отежне на младите луѓе да се справат со нереалните стандарди за убавина.
Миа вели дека уште на 12-годишна возраст, алгоритмите на социјалните мрежи ѝ прикажувале содржини што негативно влијаеле на нејзината перцепција за сопственото тело. Денес, таа забележува сè поголем број исклучително слаби и „совршени“ ликови генерирани од вештачка интелигенција, под кои младите девојки оставаат коментари како: „Тело од соништата, објави го твојот план за вежбање, сакам да изгледам така“.
„Лесно е да се каже дека тоа е само вештачка интелигенција и дека не е реално, но кога станува збор за пореметувања во исхраната, логиката не помага“, изјави Миа, повикувајќи ги младите да бидат внимателни и критички да размислуваат за содржините што ги гледаат.
Кели Вотс (41) споделува слични грижи; таа стравува дека нејзиниот 11-годишен син, Оскар, би можел да почне да го споредува своето тело со сликите од „совршени луѓе“ создадени од вештачка интелигенција.
Вотс, која работи во областа на маркетингот, вели дека сè почесто наидува на слики генерирани од вештачка интелигенција во професионални содржини – честопати без јасна назнака дека тие не се реални. „На почетокот не сфаќав дека станува збор за вештачка интелигенција, но колку повеќе ги гледате, толку повеќе ги забележувате деталите. Сега редовно го забележувам тоа“, рече таа.
Иако нејзиниот син засега нема грижи околу својот изглед, Вотс стравува дека вештачката интелигенција би можела да го зголеми притисокот на кој децата веќе се изложени поради идеализираните тела на спортистите и славните личности.
„Особено децата ќе почнат да размислуваат дали некогаш ќе можат да го достигнат тоа ниво. Тоа создава огромен притисок кој не им е потребен. Никој и ништо не е совршено. Не сакам да растат мислејќи дека мора да бидат совршени“, рече таа. Вештачката интелигенција може да ги зацврсти стандардите за убавина
Филипа Дидрихс, професорка по психологија во Центарот за истражување на изгледот при Универзитетот „Вест оф Ингланд“ во Бристол, објаснува дека луѓето природно се споредуваат со другите, но проблемот настанува кога моделите за споредба се нереални.
„Кога се споредуваме со многу тесен стандард за убавина, многумина од нас нема да можат да ги исполнат тие идеали“, вели Дидрихс.
Според неа, дигитално креираните фотографии можат дополнително да го зголемат овој проблем бидејќи луѓето што ги гледаме на нив всушност не постојат. Во исто време, вештачката интелигенција може да ги репродуцира традиционалните стандарди за убавина доколку не е фокусирана на разновидни и реални прикази на луѓето.
„Тоа значи дека, на пример, луѓето со поинаква боја на кожата или луѓето со интересни и специфични црти на лицето ќе бидат изоставени“, објасни таа.
Сепак, Дидрихс смета дека вештачката интелигенција може да одигра и позитивна улога доколку се користи за прикажување на различни тела, изгледи и карактеристики.
Сè потешко е да се препознае содржина создадена од вештачка интелигенција
Станува сè потешко да се направи разлика меѓу фотографиите генерирани од вештачка интелигенција и оние вистинските. Сепак, одредени детали – како што се текстурата на кожата, очите, косата или отсуството на пори и други несовршености – сепак можат да укажат на тоа дека фотографијата не е вистинска.
Дидрихс предупредува дека самото сознание оти фотографијата е генерирана од вештачка интелигенција не мора да значи дека личноста сепак нема да посака да изгледа така. Затоа, таа ги советува корисниците да обрнат внимание на тоа како се чувствуваат откако ќе видат таква содржина.
Ако фотографиите нè тераат да се чувствуваме како да не сме доволно убави или како да ни недостасува нешто, можеби е време да се тргнеме од тој вид содржина.
Вештачката интелигенција навлегува во светот на модата
Моделите создадени од вештачка интелигенција и таканаречените дигитални близнаци – виртуелни верзии на вистински модели – стануваат сè почеста појава во модната индустрија. Компании како „Балмен“ (Balmain), „Левис“ (Levi’s) и „Х&М“ (H&M) веќе експериментираа со оваа технологија.
Истражувачките Зои Ли и Хана Мериот од Бизнис-школата во Кардиф открија дека потрошувачите често реагираат негативно кога ќе дознаат дека личноста на фотографијата не е вистинска. Многумина изјавија дека би претпочитале да гледаат помалку вистински луѓе отколку голем број модели генерирани од вештачка интелигенција, бидејќи вештачката интелигенција не може да ги пренесе нивните автентични животни искуства.
Сè поголемата присутност на модели генерирани од вештачка интелигенција го отвора прашањето како оваа технологија ќе влијае врз перцепцијата за сопственото тело, особено кај децата и младите.