Играта „Call of Duty: Modern Warfare 3” заработи 775 милиони долари, и тоа само во првите 5 дена на продажба, со што го сруши претходниот рекорд.
Како што објави Activision Blizzard, оваа игра ги надмина сите рекорди во брзината на продажба во првите пет дена од излегувањето на пазрот, и тоа не само за игрите, туку и за филмовите и книгите.
Претходната верзија на играта „Call of Duty”, на производителот Activision Blizzard, досега го држеше рекордот. Имено, играта „Call of Duty: Black Ops” заработи 650 милиони долари во првите 5 дена на продажба, а „Мodern Warfare 2” 550 милиони долари.
Гејмерите купија 6,5 милиони примероци на „Modern Warfare 3” уште во првиот ден, со што Activision Blizzard одеднаш доби 400 милиони долари! Играта „Black Ops” мината година во првиот ден на продажба заработи 360 милиони долари, а „Modern Warfare 2” 310 милиони долари.
Ривалот на CoD, играта „Battlefield 3”, која ја објави Electronic Arts, продадена е во 5 милиони примероци во првата недела на продажба, со што на авторите им донесе 300 милиони долари.