Новиот iNuke Boom е светски најголемиот и најгласен „dock” за iPhone. Широк е 2,44 метри и висок 1,2 метри, а тежи дури 318 килограми.
Доколку класичниот аудио „dock” не ви е доволен бидејќи не сте задоволни со неговата гласност и сила, размислете за купување на iNuke Boom. Oва чудовиште испушта звук со силина од 10.000 вати – тоа е еднакво на звукот од стотина регуларни звучници кои ги имате по дома. Но цената му е исто така „силна”, околу 30.000 долари.
Овој состав на звучници го направи Behringer, германски производител на професионална аудио и музичка опрема, а се очекува на пазарот да се појави идната година.
„Сите работат нешто мало,” изјави за LА Times Марк Вилдер, потпретседателот на одделот за комуникација во Behringer.
„Ние си рековме: Ајде да направиме нешто гласно.”
Видлер тврди дека овој производ не ешега и дека iNuke Boom ќе може да се види – и слушне – на 2012 Consumer Electronics Show (CES), во јануари 2012 година во Лас Вегас.
„Не сум сигурен дали после тоа нашите соседи баш ќе не сакаат” – изјави Вилдер.
Сепак, признава дека овој состав е направен поради маркентишки цели за компанијата да ја промовира својата нова Eurosound линија на аудио опрема за домови.
„Направивме само еден како прототип, но ќе направиме уште и ќе ги продаваме ако добиваме нарачки за нив”.