Финска во четвртокот извести дека нејзиното министерство за надворешни работи било на мета на информатичка шпиунажа со огромни размери, но дека сепак не биле опфатени најчувствителните информации.
Како што изјавува министерот за надворешни работи, Ерки Туомиоја, безбедносната служба на финската полиција почнала со истрага поради сериозната шпиунажа.
“Ова е навистина многу непријатно“, признава Туомиоја, кој пред новинарите се појавил неколку часа откако една финска телевизија го обелоденила злосторството.
Како што известуваат властите, шпиунажата траела долго, а откриена е во почетокот на 2013 година. Финска веќе ги известила другите влади на Европската унија.
Според медиумите, властите на Финска сметаат дека зад овој напад стои руската и кинеската тајна служба. Министерот не сакал да ги објави имињата на осомничените, но вели дека ги има повеќе и ќе бидат објавени штом процесот официјално започне.
Интересно е дека информациите за тоа дека Финска е нападната пристигнале од надвор, а фактот дека Финска не успеала сама да ја открие шпиунажата која со години траела, е мошне непријатен, изјавил министерот.