Лијам Купер сними цел музички спот за да ја побара својата сакана за жена. 23-годишниот Австралиец со месеци го снимал видеото кое ѝ го покажал на својата девојка Ејми во кино-сала.
Видеото е преработка на видеозаписот за големиот хит „Rude“ на Magic!, а во него главна улога има и таткото на идната невеста.
За да ја реализира замислата, креативниот дечко морал да одглуми дека заминува на бизнис патување, да позајми Порше од пријател и да ги замоли пријателките на Ејми да ја носат на кафе додека тој снимал во нејзиниот дом. Резултатот е забавен предлог за брак на кој тешко некој би кажал „не“.
На крајот од видеото се појавуваат и членовите на групата Magic! и му честитаат на среќниот пар.