Back Around е насловот на најновата песна на Yon Idy, која жанровски може да се класифицира како поп, со влијание на блуз. Ова е четвртата песна која Yon Idy ја издава во период од една година. Видео спотот е снимен во Скопје и Галичник, а негови автори се Фатон Ислами и Бесник Зејнулаи.
За разлика од претходните три песни, кога тој се појавува како комплетен автор, оваа песна ја искомпонира заедно со познатиот Бобан Апостолов – NaBBoo, мулти платиниумски продуцент и композитор. Yon Idy и Бобан Апостолов – NaBBoo соработуваат и во минатото – двајцата учествуваат во создавањето на песната Knock Me Down на познатиот диџеј Галоски, на која вокалите ги пее токму Yon Idy.
Трите претходни песни на Yon Idy – Gentle, Walking the Line of Love и Waste No Love веќе станаа дел од плеј-листите на радио станиците низ Балканот, но и на значителен број радио станици низ Европа.
Yon Idy е кантавтор од Скопје, кој во своите песни самиот ги пее сите вокали и ги свири акустичните инструменти. Откако целосно се посвети на музиката, тој не престанува со творење. Веќе има подготвено уште една песна, за која останува само да се сними видео спот.