По двегодишна пауза поради пандемијата, Коачела, еден од најголемите и најпопуларни музички и уметнички фестивали во светот, конечно се одржува во Калифорнија.
Главната ѕвезда на првиот викенд на Коачела беше британскиот музичар Хари Стајлс. Тој ја воодушеви публиката со изведбите на неговите хитови и премиерната изведба на двете нови песни Boyfriends и Late Night Talking, а предизвика вистинско лудило кога на сцената ја покани легендарната кантри и поп дива Шанаја Твејн.
„Ова е посебна ноќ за мене. Оваа госпоѓа ме научи да пеам додека како дете седев во кола со мајка ми и ја слушав. Ме научи и дека мажите се ѓубре“, се пошегува Хари и и кажа на Шанаја дека засекогаш ќе и биде благодарен за спомените кои ги создал благодарение на неа.
Потоа заедно ги пееја нејзините хитови Man! I Feel Like a Woman! и You’re Still the One.
Сепак, по концертот на социјалните мрежи не се зборува само за ова големо музичко изненадување. Тема на разговор беше и облеката на Хари.
Веќе сме навикнати овој 28-годишник да ги поместува границите на машката мода, а истото го направи и во Коачела. Имено, тој настапи во модел на комбинезони со светки со длабоко деколте, кој почесто го гледаме кај познатите дами отколку кај мажите.
Очекувано, социјалните мрежи гореа од коментари за ова блескаво издание. „Комбинезонот му стои подобро од повеќето жени, а јас не би го носела толку добро“, изјави еден од обожавателите, кој го пофали новиот моден експеримент на Хари.