Како да избегнете некои од стандардните грешки?
Колку пати сте се вратиле дома уморни и сте легнале без да ја отстраните шминката.
Овој процес е многу важен и затоа професионалниот шминкер Шафран Хјуз нагласува дека е клучно да се отстрани шминката на вистински начин.
– Кога спиеме, нашата кожа се регенерира, па остатоците од шминка и нечистотија може да го попречат природниот процес на обновување на клетките. Шминката на база на масло, како што се прајмерите и подлогите, секогаш треба темелно да се отстрануваат, бидејќи маслото ја спречува кожата да дише – советува Хјуз.
Тој ги наведува златните правила за отстранување шминка.
- Без миење
За многумина првиот чекор е да го измијат лицето со вода, но ова е голема грешка. Шафран објаснува дека кога ја навлажнуваме кожата пред да го нанесеме производот, ја намалуваме ефикасноста на состојките.
– За полесно отстранување, користете средство за чистење на база на масло или лосион директно на сува кожа, пред да го исплакнете лицето со вода – советува шминкерот.
- Заштитете ги очите
Кожата околу очите е почувствителна и помека од остатокот од лицето. Користете специјално средство за отстранување шминка за очи за да ја отстраните маскарата и моливот.
– Изберете производи на база на вода, а не оние што содржат масла. Кога ја отстранувате маскарата, притиснете го туферот на трепките неколку секунди, а потоа движете го во насока на раст на трепките. Не тријте лево-десно, бидејќи ќе ви ги иритира очите – тврди Шафран.
- Марамчињата за лице не се доволни
Марамчињата за лице отстрануваат само дел од шминката и површинските бактерии, а маслото и нечистотијата остануваат во порите. Доколку навистина треба да ги користите, нека биде само подготовка, па продолжете со мицеларна вода.
– Избегнувајте чистење на пределот околу очите со марамчиња, бидејќи прекумерната употреба може да доведе до сушење на кожата и инфекции на очите – предупредува Хјуз.
- Нежно третирајте ја кожата на лицето
Без разлика каков производ користите за отстранување на шминката, погрижете се тоа да го правите нежно, без силно триење.
– Притискањето на лицето со марамче, туфер или ракавица за отстранување шминка може да доведе до сува кожа на лицето, иритација и воспаление – вели Шафран.
- Не заборавајте на кремот
По чистењето, задолжително нанесете крем, бидејќи така ќе ја компензирате влагата што е отстранета од вашата кожа за време на отстранувањето на шминката.