Многу неправедно запоставено, а некои експерти тврдат дека маслото од орев би можело да биде вистинско чудо во негата на кожата. Се користи со векови во ритуалите за подмладување, бидејќи ѝ дава на кожата висок процент на влажност.
Дури и историските документи наведуваат дека ова масло било вистински тренд во 17 век, но и многу порано, во античка Грција и Рим.
Иако не е толку популарно како арганот или бадемот, маслото од орев е врвна состојка благодарение на неговите смирувачки и антимикробни ефекти врз кожата, пишува Byrdie.
Маслото од орев се добива од самиот плод. Оревите се општо признати како еден од најздравите јаткасти плодови, а некои студии сугерираат дека дури и само консумирањето масло од орев може да го промовира здравјето на кожата.
Кога се нанесува на кожата, придобивките од маслото се уште поголеми.
Маслото од орев е емолиент за регенерација на кожата, што значи дека има моќ да ја омекне и смирува. Истражувањата покажуваат дека го подобрува здравјето на кожата, помага побрзо зараснување на раните и лечи некои кожни болести, како што е егзема.
Богато е со антиоксиданси, благодарение на големата доза на витамин Е, омега-3 масни киселини и линолеинска киселина, која, според бројни студии, ефикасно ја регенерира и омекнува кожата.
Оревот има и значително количество на витамин Б5, попознат како пантенол, кој има антивоспалителни, хидратантни и регенеративни својства.
Исто така, содржи високо ниво на линоленска и олеинска киселина, така што обезбедува влажност на кожата и помага во обновувањето на бариерата.