Публиката го обожаваше во култната серија
Сирико е најпознат по улогата на Поли Гуалтиери, познат како „Поли Волнатс“, еден од поручниците на семејството Сопрано.
Совршено го одглуми простиот и по малку нестабилен мафијаш, кого публиката го обожаваше поради неговите духовити забелешки.
Тони Сирико е Американец со италијанско потекло роден на 29-ти јули 1942 година во Бруклин, Њујорк.
Во младоста често имал проблеми со законот, а за прв пат бил уапсен кога имал седум години поради кражба во продавница.
Во шеесетите бил поврзуван со мафијата, а бил познат по прекарот „Јуниор“.
Бил апсен вкупно дваесет и осум пати и два пати бил осуден, првиот пат за недозволено носење огнено оружје, а вториот за учество во вооружен грабеж.
Заинтересираност за глума пројавил за време на втората затворска казна во затворот „Sing Sing“, поточно кога затворот го посетила патувачка група актери наречена „Театар на заборавените“, која главно била составена од поранешни затвореници.
Првата улога ја одигра во филмот „Лудиот Џо“ во 1974 година. Во текот на својата актерска кариера, тој се појави во неколку филмови кои беа успешни и кај критиката и во поглед на заработката, меѓу кои „Мртви претседатели“ од 1987 година и „Добри момци“ од 1990 година.