Недостатокот на сон е проблем за повеќето луѓе.
А тоа е директно поврзано со бројни здравствени проблеми.
Спиењето влијае на физичкото и менталното здравје, како и на севкупниот квалитет на животот.
Сепак, дали знаевте дека непроспиените ноќи можат да бидат одговорни и за себично однесување кај луѓето.
Според резултатите од истражувањето објавени во списанието PLOS Biology, недостатокот на сон може да влијае на тоа колку и дали едно лице ќе помогне на друг. Истражувачите од Универзитетот во Калифорнија го испитале „себичниот“ ефект со спроведување на три студии.
Тие ги анализирале промените во нервната активност и однесување поврзани со помагањето на другите и откриле дека има многу промени кога недостасува дури и мала количина на сон.
Истражувачите Ети Бен Сајмон и Метју Вокер рекоа: „Кога луѓето губат еден час сон, постои јасен удар на нашата вродена човечка добрина и нашата желба да им помогнеме на другите луѓе на кои им е потребна. Постојано се покажуваше дека сонот влијае на нашето расположение и когнитивната функција, и затоа веројатно влијае на тоа како се однесуваме со другите“.
Според истражувањата, оние луѓе кои се лишени од сон имаат помала веројатност да им помогнат на другите отколку оние кои имале добар сон. И бидејќи повеќе од половина од вработените луѓе велат дека не спијат доволно во текот на работната недела, достигнуваме „глобална епидемија на губење на сонот“.
Покрај себичноста, губењето на сонот влијае и на менталното здравје, а постои и зголемен ризик од анксиозност и депресија, како и физички болести како дијабетес и дебелина.
Колку сон навистина ни треба?
Според американскиот Центар за контрола и превенција на болести (ЦДЦ), возрасните треба да спијат помеѓу 7 и 9 часа секоја вечер.
Исто така, експертите наведуваат дека, спротивно на популарното мислење, дополнителен час или два за време на викендот не може да го надомести изгубениот сон за време на напорната недела.