Иако поминаа 18 години од вториот дел од „Дневниците на принцезата“, љубителите на оваа романтична комедија со Ен Хатавеј во главната улога отсекогаш се надеваа дека во одреден момент ќе се снима и трет. Па, можеби ќе ја добијат својата желба.
Според извори за Холивуд Репортер, моментално се работи на сценариото за третиот дел од филмот според книгата на Мег Кабот. Главен сценарист е Адрита Мукерџи, додека продуцент е Дебра Мартин Чејс, која ги продуцираше двете продолженија.
Дизни сè уште не ги потврдиле гласините за снимањето, ниту дали Хатавеј ќе ја повтори улогата на Миа Термополис, американска средношколка која дознава дека е принцеза од Џенова и поминува обука за кралско однесување од нејзината баба, кралицата Клариса Реналди, која ја игра легендарната Џули Ендрјус.
Не се знае дали и таа ќе се појави во продолжението, иако претходно призна дека може да се види во него, во зависност од тоа какво ќе биде сценариото.
„Можеби сум само малку престара баба за тоа, не знам. Зависи каква е приказната и дали можам да смислам нешто, тоа би било прекрасно. Но, ако не, ќе има други работи“, изјави Ендрјус за Entertainment Tonight.
Во јануари 2019 година, Хатавеј откри дека знаела дека првиот филм ќе биде хит. „Кога го добив сценариото, само го имав ова чувство… го допрев и беше електрично“, рече актерката и додаде дека улогата покрај нејзината колешка Ендрјус за неа е „остварен сон“.
“Можев да ја гушкам секој ден на сетот, тоа беше одлично чувство. Потоа излезе филмот и публиката одлично го прими. И беше многу магично”, откри Хатавеј, која го изрази својот ентузијазам за идејата за трет филм во минатото.
“Има сценарио, постои! Сакам да го направам тоа. Џули сака да го направи тоа. Дебра Мартин Чејс, нашиот продуцент, сака да го направи тоа. Сите ние навистина сакаме тоа да се случи”, изјави актерката во 2019 година за време на гостувањето на „Watch What Happens Live with Andy Cohen“.