Актерот и мајстор за боречки вештини Џеки Чен посочи дека има планови за снимање на четвртиот дел од успешната акциона хумористична серија „Rush Hour“.
– Во моментов зборуваме за „Rush Hour 4“, забележа Чен, потсетувајќи се на создавањето на серијалот, како гостин на „Меѓународен филмски фестивал Црвено Море“ во Саудиска Арабија.
Ѕвездата на серијата успешни филмови за боречки вештини од Хонг Конг, Чен на почетокот не сакал да го прифати „Rush Hour“, во режија на Брет Ратнер, иако улогата на полицаец била напишана само за него.
„Сум играл полицајци од Хонг Конг, од Макао, од Кина, отсекогаш сум бил полицаец. Може ли да играм нешто друго? „Не“, ќе одговореа тие. Тогаш мојот менаџер рече дека има сценарио наречено „Rush Hour“. Полиција во Хонг Конг. Реков: „Не“, се сеќава Чен.
Според него, сценариото не предвидувало да игра Кинез роден во САД, туку полицаец од Хонг Конг кој доаѓа во Америка и лошо зборува англиски.
На крајот решил да се испроба во таа улога, иако мислел дека филмот од 1998 година, во кој Крис Такер го игра неговиот партнер како американски полицаец, нема да биде успешен во кината.
„Потоа дојде телефонскиот повик. Ратнер и Такер ми се јавија од Њујорк. Тие се луди. Имавме 70 милиони долари по првиот викенд! Потоа го направивме вториот и третиот дел (од 2001 и 2007 година)“, се сеќава Чен.
И по неколку стотици филмови, Чен нема намера да забави и размислува за неколку сценарија, меѓу кои се филм во кој се појавуваат само тој и птица и друг во кој глуми дедо кој се грижи за панда, а исто така би сакал да снима повеќе љубовни приказни.
„Имам толку многу работи, толку многу сценарија во мојата глава што се надевам дека ќе ги завршам во следните десет години“, рече Чен.