Трикови кои обезбедуваат пирето да биде кремасто, лесно и воздушесто
Пирето од компири е омилениот прилог на масите во домовите ширум Македонија. Иако рецептот за пире е еден од првите што ги учат домаќинките, често се случува овој прилог да нема кремаста структура, ниту да биде лесен и воздушест како што треба.
За да не ви се случи тоа, применете ги триковите на искусните домаќинки и избегнувајте ги четирите најчести грешки при подготовката на пирето.
- Изберете бели компири за пире
На пазарите и во маркетите има многу сорти на компири, но не сите се идеални за подготовка на пире.
Најдобро пире ќе направите ако купите таканаречен бел компир, бидејќи содржи повеќе скроб, кој е одговорен за кремастата структура на пирето.
- Заборавете на врелата вода
Со цел да се забрза процесот на варење на компирот, повеќето домаќинки ги преливаат излупените компири со жешка вода и така ги варат. Тоа е голема грешка, бидејќи со потопување на компирот во топла вода, тој однадвор станува помек, но внатре останува „дрвенест“.
Кога варите компири за да го подготвите пирето, ставете ги во ладна вода, посолете малку и варете на средна температура.
- Компирите мора да бидат со еднаква големина
Кога купувате компири, обидете се да изберете парчиња кои се приближно со иста големина. Ова е единствениот начин да се осигурате дека компирот ќе се свари рамномерно.
Ако сте купиле големи компири, задолжително исечете ги пред варењето.
- Млекото мора да отстои на собна температура
Трите основни состојки за подготовка на пире се компирите, маргарин (или путер) и млеко. Повеќето домаќинки грешат, па кога ги пасираат компирите, додаваат парче маргарин или путер и ладно млеко од фрижидерот.
Додавањето ладно млеко во топлото пире од компири резултира со грутки наместо мазно, кремасто пире.
Најдобро е да го извадите млекото од фрижидер веднаш штом ќе ги ставите компирите да се сварат и да го оставите да отстои на собна температура. Така полесно ќе се соедини со топлиот испасиран компир.