Миењето на косата изгледа како наједноставната задача на светот, но ако изоставите важен чекор, тaа нема да биде свиленкаста, полна со волумен и сјај како кога ќе излезете од фризерскиот салон, на пример.
Кога ја миете косата, навистина нема многу простор за грешки: намокрете ја косата, нанесете шампон и добро исплакнете – и тоа е тоа. Барем сите така сме мислеле.
Елизабет Бухадана од „L’Oréal Paris International“ ја откри најчестата грешка при миење на косата и не, не станува збор за нанесување регенератор по целата коса.
Имено, можеби не сте знаеле дека треба да ја шампонирате и исплакнете косата двапати по ред.
Вака измиената коса ќе изгледа многу поубаво и поживо.
„Косата секогаш треба да се мие двапати по ред. Со првото миење, скалпот и косата се ослободуваат од нечистотија. За време на второто миење, хранливите активни состојки во шампонот продираат во косата“, објаснува таа, а пренесува „Тпортал“.
Сепак, тоа не значи дека треба да користите двојно поголема количина на шампон.
„При миење на косата доволно е да користите мала количина шампон. Покрај тоа, треба да се мие само на секои два до три дена, така што скалпот ќе има доволно време помеѓу миењето за да произведе себум и да го обнови својот природен заштитен слој. Само така вашата коса ќе остане убава и полна со волумен долго време“, заклучува експертот.
Исто така, треба да се запомни дека влажната коса никогаш не треба грубо да се трие по миењето. Ако е можно, исушете ја на воздух или само нежно исцедете го вишокот вода со крпа наместо да ја триете. Исто така, бидете многу внимателни и нежни кога ги расчешлувате влажните прамени.