Овој септември, Наоми Кембел, Синди Крафорд, Линда Евангелиста и Кристи Тарлингтон ќе глумат во документарната серија „The Super Models“.
Речиси три години по првичното објавување на веста, конечно имаме датум за премиера на документарната серија на стриминг платформата „Apple TV+“, во која ќе учествуваат Наоми Кембел, Синди Крафорд, Линда Евангелиста и Кристи Тарлингтон. Серијата ќе се фокусира на најголемите манекенски имиња кои чекореле на пистата во деведесеттите, а во исто време, ѕвездите од серијата се и меѓу извршните продуценти на проектот.
Што можеме да очекуваме од овој документарец?
Документарната емисија ќе има уникатен и посебен поглед на кариерите на овие четири икони со „до сега невиден пристап до моделите“, велат од „Apple“.
Серијата ќе вклучува ексклузивни интервјуа и разговори, ќе слушаме приказни од нивните поранешни фази на манекенство во Њујорк во осумдесетите, а потоа креаторите ќе се фокусираат на моментот кога овие модели ефективно ја сменија целата модна индустрија во текот на деведесетите. Пред овие моќни жени, дизајнерите беа најголемите имиња и ретко се знаеа имињата на моделите од кампањите.
Тоа е ултимативна приказна за моќта, промената која го отвори патот за сите идни модели. Денес, овие жени се вистински културни икони: претприемачи и филантропи.
„Моите сестри Кристи, Линда, Синди и јас сме исклучително возбудени што ќе ја споделиме нашата приказна со светот“, напиша Наоми на својот профил на Инстаграм, додавајќи: „Се надеваме дека нашето патување прикажано во документарецот ќе ги охрабри, мотивира и инспирира младите луѓе ширум светот.
„Apple TV+“ штотуку го објави првиот трејлер, а првиот од четирите дела од серијата ќе биде достапен за пренос од 20-ти септември 2023 година.