Болката во нозете при одење може да укаже на заболување на периферните артерии.
Многу луѓе чувствуваат болка во нозете кога одат, а тоа обично го припишуваат на стареењето или заморот. Сепак, може да биде знак за нешто многу посериозно, пишува „klix.ba“.
Лекарите предупредуваат дека тоа може да значи дека страдате од периферна артериска болест, наречена и периферна васкуларна болест.
Ова е честа состојба на срцето каде што акумулацијата на масни наслаги во артериите го ограничува протокот на крв во мускулите на нозете – предизвикувајќи болка.
Овие парчиња маснотии исто така можат да го блокираат протокот на крв во мозокот, што може да доведе до фатални срцеви и мозочни удари.
Истражувањата покажаа дека секое петто лице со оваа дијагноза, доколку не се дијагностицира и лекува, веројатно ќе доживее срцев или мозочен удар во рок од пет години.
Промена на животниот стил
Професорот Дејвид Њуби, од Британската фондација за срце, објасни како болката во нозете е поврзана со состојбата.
– Ако чувствувате грчеви во нозете додека одите, можеби е добра идеја да се обратите кај вашиот лекар, бидејќи тоа може да биде симптом на периферна васкуларна болест. Најчеста е кај пушачите и кај лицата со дијабетес – вели тој.
За лекување на оваа состојба, лекарите препорачуваат промена на начинот на живот. Тоа вклучува редовно вежбање, избегнување на цигари и исхрана богата со овошје, зеленчук, здрави масти и цели зрна.
Треба да се третираат и темелните причини, вклучувајќи ги високиот крвен притисок, високиот холестерол и дијабетесот.