Џастин Тимберлејк, Џеј Си Чесез, Џои Фатоне, Крис Киркпатрик и Ленс Бас ги воодушевија обожавателите со веста за повторното обединување на NSYNC по повеќе од две децении. Петорката наскоро ќе ја објави првата песна по 2001 година, кога ја снимија „Girlfriend“, а причина за повторното обединување е новиот цртан филм во кој Џастин Тимберлејк му го позајмува гласот на еден од ликовите.
Цртаниот филм „Trolls Band Together“ е задолжен да ги оствари желбите на сите фанови на еден од најомилените бој-бендови на сите времиња. Поради него NSYNC се обединува за прв пат од 2018 година, кога се сретнаа само за да го прослават добивањето на ѕвезда на Булеварот на славните. Но, овој пат тие не само што ќе се фотографираат заедно, туку и ќе не почестат со нова песна која ќе биде дел од споменатиот филм.
Навестување за повторното обединување е видливо во трејлерот за филмот, во кој ликот на Флојд му кажува на ликот зад гласот на Тимберлејк: „Не сме синхронизирани. Од момчиња преминавме на мажи, а сега има само една насока во која може да одиме: од задните улици.” Тоа е референца за познатите бојбендови кои со текот на годините околу себе собраа војски навивачки кои не можеа да се помират со нивните распаѓања.
NSYNC ја запали сцената од 1995 до 2002 година, кога Џастин Тимберлејк започна соло кариера, а освен во 2018 година, групата, без Џастин, се собра во 2019 година кога и се придружија на Аријана Гранде на сцената на Коачела. Сепак, тешко дека ова обединување ќе резултира со нов албум. Барем така навести Нели Фуртадо, која неодамна откри дека Џастин веќе некое време работи со Тимберленд на нов албум и дека ќе им се придружи на една од песните.