На 82-годишна возраст, во болница почина актерот Мајкл Гамбон, познат по улогата на Дамблдор во филмовите за „Хари Потер“. Актерот почина од пневмонија, а веста ја соопшти неговото семејство. „Уништени сме што мора да објавиме дека сер Мајкл Гамбон почина. Нашиот сакан сопруг и татко, тој почина мирно со сопругата Ана и синот Фергус покрај него“, напиша семејството во објавата. Семејството бара приватност во овој тежок период, но тие се благодарни за љубезните пораки и поддршката што ја добиваат од обожавателите.
Се огласија и на Инстаграм од филмот Хари Потер. „Со тага дознаваме дека сер Мајкл Гамбон почина. Тој им донесе огромна радост на обожавателите на Хари Потер ширум светот со својот хумор, добрина и грациозност. Неговиот спомен засекогаш ќе го чуваме во нашите срца“, напишаа тие во објавата.
Мајкл Гамбон е роден во Даблин на 19 октомври 1940 година, неговата мајка била шивачка, а татко му се преселил во Лондон и бил резервен полицаец за време на Втората светска војна. Мајката на Мајкл го однела во Англија на крајот на војната за да може да биде поблиску до неговиот татко. Тие подоцна се преселиле во Кент, каде на 16-годишна возраст, по напуштањето на училиштето, го започнал своето инженерско образование во фабриката Викерс Армстронг. До 21-та година бил висококвалификуван инженер, но во таа професија останал многу кратко бидејќи почнал да се занимава со актерска кариера.
Прво почнал да работи во аматерски театар како сценограф, а потоа завршил на сцената во мали улоги во лондонскиот театар „Unity Tower“. На 22-годишна возраст, тој го направил своето деби во Вест Енд во претставата „The Bed-Sitting Room“, а исто така посетувал курс по глума во Кралскиот двор предводен од Џорџ Дивајн и Вилијам Гаскил. На телевизискиот екран, тој имаше успех во мјузиклот „The Singing Detective“, каде играше мистериозен писател кој е хоспитализиран поради псоријатичен артритис. Друг успех беше трилерот каде го играше белгискиот писател Жорж Сименон. Тој, исто така, глумеше во филмови како „Gosford Park“, „Sleepy Hollow“ и филмовите за Падингтон.
Подоцна се повлекол од сцената, а во 2014 година изјави дека имал проблеми да се сети на текстот на драмите. „Се чувствувам многу тажно поради тоа. Го сакам театарот, но не можам да се видам себеси како глумам во големи улоги“, рече Гамбон. Публиката најдобро го памети како професор Албус Дамблдор во шесте филмови за Хари Потер, улога што ја доби откако го замени Ричард Харис. Во кариерата што траеше пет децении, актерот освои четири телевизиски БАФТА, три награди Оливие, две награди од здружението на актерите на екранот и разви кариера во филмот, телевизијата, радиото и театарот.
View this post on Instagram