На некои им се допаѓа вкусот, други уживаат во самиот ритуал, а на други едноставно им е потребен за да се разбудат, а за некои тоа е комбинација од сите три фактори.
Која количина на кофеин генерално се смета за безбедна?
За повеќето луѓе кои немаат никакви несакани срцеви заболувања, конзумирањето кофеин се смета за безбедно до одреден степен.
– Според Американското здружение за срце и Управата за храна и лекови на САД, се покажа дека три до четири шолји кафе дневно се безбедни за повеќето луѓе и не се поврзани со негативни ефекти врз здравјето на кардиоваскуларниот систем или здравјето генерално – рече др. Џејмс Уделсон, шеф на кардиологија во медицинскиот центар Тафтс, пишува Huff Post.
Во зависност од јачината на вашето кафе, три до четири шолји обично се некаде помеѓу 300-400 милиграми кофеин.
Кои се некои знаци дека сте пиеле премногу кофеин?
– Знаците на премногу кофеин може да вклучуваат несоница, нервоза, палпитации (забрзано чукање на срцето), прекумерно потење, гадење и главоболка – изјави Уделсон. Има и долгорочни ефекти од претерувањето со кофеин.
– Хроничната употреба на премногу кофеин може да се поврзе со хронични проблеми со спиењето, анксиозност, стомачни проблеми, висок крвен притисок и нарушувања на срцевиот ритам – додаде тој.