Истражувањето опфатило околу 380.000 луѓе кои живеат во Шкотска, а студијата покажува дека возењето велосипед до работа го намалува ризикот од депресија и анксиозност.
Патувањето со велосипед резултирало со поголемо намалување на рецептите за лекови за ментално здравје кај жените отколку кај мажите, според истражувањето на Универзитетот во Единбург – иако мажите имаат поголема веројатност да возат велосипед.
Истражувачите комбинираа податоци за 378.253 луѓе на возраст од 16 до 74 години од пописот на Шкотска во 2011 година со податоци за рецепти од британската Национална здравствена служба за следните пет години.
Испитаниците живеат и работат во Единбург или Глазгов, живеат на километар и половина од велосипедската патека и немале рецепт за антидепресиви на почетокот на студијата.
Истражувачите откриле 15 отсто помалку рецепти за депресија или анксиозност меѓу велосипедистите во петте години по 2011 година во споредба со невелосипедистите.
Водачот на истражувањето, професорот Крис Дибен од Факултетот за геонауки на Универзитетот во Единбург, рече:
„Нашето откритие дека овој економичен и одржлив метод на патување, исто така, го подобрува менталното здравје, сугерира дека политиките за инвестирање во велосипедски патеки и поттикнување на активно патување најверојатно ќе имаат широк опсег на придобивки.“
„Не само што ова може да го подобри менталното здравје на луѓето, туку може да помогне и во намалување на емисиите на јаглерод, застојот на патиштата и загадувањето на воздухот.“