Водата со лимон е популарен пијалок во изминатите десет години, а познатите личности и корисниците на социјалните мрежи тврдат дека може да промовира губење на тежината, да помогне за почиста кожа и многу повеќе. Разгледавме како настанал трендот на вода со лимон и дали има некаква научна основа за придобивките што му се припишуваат на пијалокот.
На TikTok, луѓето велат дека пиењето вода со лимон им помогнало да се детоксираат, да се справат со акните и да ослабат. Едно видео, прегледано повеќе од 14 милиони пати,уверува дека во рок од една недела по пиењето вода со лимон, луѓето ќе забележат зголемување на согорувањето на калориите, што потенцијално ќе помогне во контролата на тежината, како и подобрување на фокусот, повеќе енергија и зајакнат имунолошки систем.
Познатите личности како Гвинет Палтроу и Миранда Кер го поддржуваат трендот на вода со лимон. Како резултат на тоа, водата со лимон стана популарна како задолжителен пијалок за оние кои сакаат да изгубат тежина или да го подобрат своето здравје. Но, дали навистина водата со лимон треба да биде вашиот главен пијалок ако сакате да ја контролирате вашата тежина? Или тоа е уште еден псевдо-велнес тренд кој не вреди?
Како дојде до овој тренд?
„Не е сосема јасно како започна овој тренд, но пиењето вода со лимон е стар народен лек“, изјави за “Health” Мелиса Митри, диететичар и автор на книги за здрава исхрана. Иако водата со лимон не е нужно нов тренд, таа стана особено популарна во последната деценија. „Кога една јапонска студија од 2008 година ги поврза антиоксидансите во лимоните со помало зголемување на телесната тежина кај глувците, интересот на јавноста за оваа практика се зголеми“, објасни Митри. Некои веруваат дека киселината во лимонот ги „разградува“ масните клетки. Сепак, има малку докази за поддршка на оваа теорија.
Правењето вода со лимон е едноставно – исечете лимон и исцедете го сокот и додадете го во чаша вода. Се служи топла, ладна или на собна температура, водата со лимон е одлично освежување без додаден шеќер.
Што покажа истражувањето за водата со лимон и губење на тежината?
Пиењето вода со лимон е одличен начин да го зголемите внесот на вода во текот на денот, а лимонот е добар извор на антиоксиданси, витамин Ц и мали количини на магнезиум, рибофлавин, витамин Б-6. Сепак, експертите се согласуваат дека препаратот нема да им помогне на сите да ослабат. „Водата со лимон не е нужно подобра од обичната вода за управување со тежината“, изјави за “Health” Саманта Тарнер, регистриран диететичар и сопственик на “OakStone Health and Nutrition”. „Нема истражување кое покажува дека водата со лимон е подобра од обичната вода за слабеење“, додаде Митри. „Пиењето повеќе вода, генерално, е поврзано со зголемена ситост, губење на тежината и поздрав метаболизам. Истражувањата покажаа дека пиењето повеќе вода е поврзано со зголемено разградување на мастите и намален внес на храна. Зголемената хидратација е поврзана и со подобро здравје, според студија од 2019. Истражувањата покажаа дека како што се зголемува потрошувачката на вода, телесната тежина се намалува. Не постои истражување за да се потврдат наводните придобивки од сокот од лимон. Киселоста на сокот од лимон е поврзана со позитивен ефект врз гликемискиот одговор или флуктуацијата на нивото на гликоза во крвта по консумирање јаглени хидрати.Студија од 2021 година покажа дека учесниците кои пиеле 250 милилитри сок од лимон (околу една шолја) имале помал скок на шеќерот во крвта откако изеле парче леб во споредба со луѓето кои пиеле иста количина чај или вода. Резултатите од оваа студија, исто така, покажаа дека сокот од лимон ја зголемува секрецијата на желудникот и стапката на празнење, што може да го поддржи губењето на тежината. Ова може да значи дека водата со лимон е здрав пијалок после оброк, но потребни се повеќе податоци. Покрај киселоста, лимонот содржи и витамин Ц, а во зависност од тоа колку ќе додадете, може да даде одредени придобивки. Во студиите на луѓе и на глувци, повисокиот внес на витамин Ц беше поврзан со помал ризик од метаболички синдром, кој се однесува на зголемен обем на половината, шеќер во крвта, крвен притисок, триглицериди и/или намалување на „добриот“ холестерол. Според истражувачите, ова сугерира дека суплементацијата на витамин Ц или адекватен внес во исхраната може да помогне да се отстранат некои од овие симптоми. Пиењето вода со лимон за слабеење или контрола на тежината треба да се комбинира со други здрави навики. „Кога вода со лимон се консумира заедно со добри навики во исхраната кои вклучуваат овошје, зеленчук, цели зрна, посни протеини, јаткасти плодови и семки, заедно со редовно вежбање, тоа може да помогне за подобро управување со тежината“, рече Тарнер.,
Дали е добро да се пие вода со лимон секој ден?
Ако сакате редовно да пиете вода со лимон, исто така е важно да имате на ум неколку работи. Високата киселост на лимонот може да ја уништи забната глеѓ ако се консумира во големи количини. За да го намалите овој ризик, размислете да пиете вода со лимон преку сламка, а потоа исплакнете ја устата со обична вода. Луѓето со гастроезофагеална рефлуксна болест (ГЕРБ) или слична состојба може да забележат влошување на симптомите по консумирање вода со лимон. Како и со сите промени во исхраната, секогаш е препорачливо да се консултирате со лекар за да се осигурате дека овие промени ќе бидат корисни за вашето здравје.