Зелениот чај е исто толку познат по своите потенцијални здравствени придобивки колку што е познат по неговата препознатлива боја. Овој пијалок постои со милениуми, се користи за хидратација и медицински цели, а истражувачите го нарекуваат „втор најпопуларен пијалок во светот по водата“. Зелениот чај се здоби со репутација на суперхрана и еликсир за здравје, со тврдења дека може да влијае на сè, од срцеви заболувања и ризик од рак до губење на тежината, пишува Yahoo. Но дали е тоа вистина?
Самото пиење чај е генерално здрава навика, особено ако е замена за слатки пијалоци, вели диететичарот Тереза Фунг, „Чајот сам по себе е одличен бидејќи има антиоксиданси. Пијте течности преку чај наместо сокови и газирани пијалоци“.
Редовното консумирање зелен чај може да биде корисно за здравјето на луѓето, додава д-р Џеј Ли, медицински директор во Integrated Health Partners од Јужна Калифорнија: „Многу пациенти се колнат во него и веруваат дека им помага да се чувствуваат добро“.
Што е сепак зелен чај?
Зелениот и црниот чај доаѓаат од исто дрво, но листовите од чајот се обработуваат поинаку откако ќе се берат. За да се направи црн чај, листовите се оксидираат – се оставаат да се исушат и потемнат – долго време. Зелениот чај се подложува на многу помала обработка, што подобро ги зачувува антиоксидансите во листовите.
Бидејќи претежно е вода, зелениот чај е нискокалоричен пијалок се додека не додавате засладувачи. Една чаша содржи:
– 2 калории
-29 милиграми кофеин
-0,5 грама протеини
– 2 милиграми натриум
Чистиот зелен чај нема масти, шеќери, јаглени хидрати или влакна. Содржи траги од магнезиум, калиум, манган и рибофлавин.
Зелениот чај е посебен бидејќи содржи силни антиоксиданси наречени полифеноли. Антиоксидансите можат да ги неутрализираат слободните радикали – штетни честички кои се создаваат кога телото ги извршува редовните процеси кои ни се потребни за да живееме. Бидејќи некои од овие слободни радикали се и воспалителни, антиоксидансите би можеле да го намалат ризикот од воспалителни болести, како што е ракот, пишува Večernji list.
Катехините се доминантни полифеноли во зелениот чај, а истражувачите го проучуваат нивниот потенцијал во спречувањето на ракот на дојката, белите дробови, простатата, желудникот и панкреасот. Но, студиите за зелениот чај и ракот кај луѓето дадоа неконзистентни резултати, според Националниот центар за комплементарно и интегративно здравје.
И зелениот и црниот чај може да имаат корисни ефекти врз факторите на ризик од срцеви заболувања, како што се крвниот притисок и холестеролот, но неколкуте студии спроведени во оваа област имаат ограничувања, па не се донесени дефинитивни заклучоци. Кога станува збор за шеќерот во крвта, зелениот чај може да го намали. Во краткорочните студии, додатоците на зелен чај „значително ја намалуваат гликозата на гладно“, но потребни се подолготрајни испитувања, пишува Yahoo.
Изненадувачка придобивка од зелениот чај е тоа што природно содржи флуор, кој го спречува расипувањето на забите, бидејќи чајното дрво го извлекува минералот од почвата. Едно истражување покажа дека мача зелениот чај во прав има највисока концентрација на флуор од различните типови на чај тестирани.
Дали зелениот чај ви помага да изгубите тежина или да го намалите салото на стомакот?
Не, вели Фунг. Содржи кофеин, кој може привремено да ја зголеми стапката на метаболизмот малку, но „навистина нема да биде доволно да се направи ништо“, објаснува таа. Екстрактите од зелен чај не доведуваат до значително губење на тежината кај возрасните со прекумерна тежина или дебели и не им помагаат на луѓето да ја задржат телесната тежина, забележува Националниот центар за комплементарно и интегративно здравје.
„Луѓето мислат дека ако испијат неколку шолји зелен чај, ќе видат топење на мастите“, вели Дејвид Ниман, директор на Лабораторијата за човечки перформанси на Државниот универзитет во Апалачи, „тоа едноставно нема да се случи“.
Дали е добро да се пие зелен чај секој ден?
Да, се верува дека до осум шолји дневно се безбедни за пиење, според Националниот центар за комплементарно и интегративно здравје. И, пијте најмалку три шолји дневно за да ги искусите здравствените придобивки, вели Фунг.
Ако сте чувствителни на кофеин, треба да ја прилагодите количината за да не претерате и да почнете да се чувствувате лошо, советува Ли: „Малите количества на кофеин, ако тоа е нешто што некој редовно го консумира, не треба да претставуваат проблем“. Шолја зелен чај содржи околу една третина од кофеинот што се наоѓа во шолја кафе.
Пиењето обичен зелен чај е најефикасно, но можете да додадете лимон или мед на него ако сакате. Исто така, експертите препорачуваат сами да си сварите чај и да го пиете наместо да земате додатоци со екстракт од зелен чај.
Забележани се проблеми со црниот дроб кај лица кои земале екстракти од зелен чај во форма на таблети, па луѓето со заболувања на црниот дроб треба да се консултираат со лекар пред да користат производи со екстракт од зелен чај, предупредува Националниот центар за комплементарно и интегративно здравје, пренесува Večernji list.