Понекогаш храната, од нашиот најдобар пријател, може да се претвори во наш непријател, а тоа е се поради генетската предиспозиција. Еве како да откриете дали многу од вашите симптоми, дури и оние кои тешко се поврзуваат со храна, како болки во зглобовите или анксиозност, се поврзани со храната.
За разлика од алергиите на храна, интолеранцијата на некои намирници не го загрозува животот, но квалитетот на животот секако го загрозува.
Се проценува дека околу 20 проценти од светската популација се бори со овој проблем, а тој процент сѐ уште се зголемува. Она што дополнително го комплицира овој проблем е тоа што интолеранцијата на храна е тешко да се дијагностицира, а луѓето исто така генерално не ги поврзуваат симптомите исклучиво со нивната исхрана, бидејќи тешкотиите што ги чувствуваат на прв поглед не се поврзуваат со варењето.
И додека дијареата, надуеноста, стомачната болка или рефлуксот укажуваат на проблеми кои можат да бидат предизвикани од храната, многу симптоми е тешко да се поврзат со тоа. Имено, интолеранцијата кон одредена храна, односно состојките на таа храна, може да предизвика цела низа „неочекувани“ симптоми.
Често се манифестираат на кожата како осип, чешање, дерматитис, но влијаат и на респираторниот систем. Оток на носната слузница, синузитис или сува кашлица, меѓу другото, може да бидат симптоми на интолеранција на една или повеќе намирници. Но, она што особено знае да ги измачува луѓето и кое ретко кој може да го поврзе со храна се невролошки симптоми како главоболки, вртоглавица, па се до психолошки симптоми како губење на мотивација, анксиозност, замор или дури и хиперактивност кај децата.
Дополнителна компликација е што можеме да бидеме интолерантни на различни видови храна, додека поголемиот дел од луѓето се интолерантни на лактоза и глутен. Многу намирници, или состојките во нив, може да предизвикаат симптоми на интолеранција, на пример, многу луѓе се интолерантни на кофеин, храна и пијалоци кои содржат сулфати кои природно се наоѓаат во грозјето, виното и зрелото сирење и се додаваат во храната како конзерванс.
Но, најчесто тоа се глутенот и лактозата. Лактозата е шеќер во млекото и млечните производи, а интолеранцијата се манифестира како болки во стомакот, надуеност, дијареа, гасови и гадење. Глутенот е протеин во некои житарки како пченицата, јачменот и ‘ржта, а симптомите на интолеранција се многубројни – од надуеност, дијареа или запек, болки во стомакот, до главоболки, замор, болки во зглобовите, осип на кожата, анемија и, замислете, депресија или анксиозност.
Значи, храната е наш пријател, но понекогаш, поради нашите гени, делови од неа знаат да се претворат во наш непријател и да ни го уништат квалитетот на живот. Бидејќи симптомите се многубројни и разновидни, тешко е сите да се поврзат со исхраната и многу луѓе продолжуваат да живеат со болка и непријатност. Сепак, постои излез – уверете се дали сте интолерантни, прилагодете ја исхраната и почнете да живеете без проблеми.