Речиси сите сме имале главоболка барем еднаш во животот, а таа често е резултат на различни фактори кои не се нужно опасни. Понекогаш ни служи како предупредување дека сме дехидрирани, дека сме ненаспани, дека треба да се прошетаме на свеж воздух или да се откажеме од алкохолот и цигарите.
Меѓутоа, главоболката може да сигнализира и дека треба да посетиме лекар и дека нешто се случува во нашето тело. Имено, таа е придружен феномен за многу болести во главата (око, уво, грло, нос, заби), за промени во цервикалниот ‘рбет или во крвниот притисок, за болести на крвните садови, повреди на главата и тумори.
Ова се некои знаци дека главоболката може да биде потенцијално опасна, ако сте инаку во добра здравствена состојба.
- Главоболката е пулсирачка, силна и не се намалува со употреба на аналгетици
Главоболката која е досадна, силна и неподнослива и не исчезнува кога земате лек против болки може да биде знак за болест, грип, мигрена и други нарушувања кои треба да се лекуваат.
- Главоболка само на еден дел од главата
Ако ве боли само еден дел од главата, тоа може да е резултат на воспалителна болест. На пример, ако имате инфекција на синусите, може да почувствувате болка само во предниот дел на главата, челото и очите.
- Главоболка каква што досега не сте имале, се појавила ненадејно и е исклучително силна
Доколку не сте склони кон главоболки, а имате ненадејна и силна главоболка, задолжително посетете лекар. Тој ќе утврди дали се работи за воспалителен процес, нарушување на цервикалниот ‘рбет или инфекција која ја предизвикала необичната болка.
- Главоболка придружена со конфузија, поспаност и нарушување на рамнотежата
Оние кои страдаат од мигрена често доживуваат и други последици освен главоболки. Ако болката е придружена со општа конфузија, слабост и чувствувате дека треба веднаш да легнете, може да имате периодична главоболка која треба да се дијагностицира.
- Главоболка придружена со мачнини, повраќање и слабост
Мачнините се уште една последица на мигрената, но може да биде и показател за болест или воспаление. Лекарот ќе користи тестови за да ја утврди причината за главоболката, која, придружена со овие други симптоми, може да биде индикација за болест.
- Главоболка која ви го отежнува секојдневјето и ви го менува расположението
Ако подолго или силно ве боли главата, таквата состојба ви го отежнува животот затоа што станувате раздразливи, исцрпени, тажни и неподготвени за обични секојдневни активности. Важно е да реагирате и да отидете на преглед за да ја преземете контролата врз ситуацијата и врз вашето здравје. Можно е дека станува збор за многу излечиви нарушувања во хормоните кои треба да се регулираат.
- Главоболка што ја чувствувате по повреда на главата
Повреда на главата може да се случи во секојдневни ситуации и важно е да реагирате доколку почувствувате болка, вртоглавица и мачнина по таква повреда. На пример, ако нешто ви паднало на глава или се удрите, може да имате благ потрес на мозокот. Затоа е важно да отидете на лекар и да опишете каде сте се удриле и какви симптоми сте искусиле оттогаш. Навидум безопасна ситуација може да биде опасна ако не реагирате на сигналите што ви ги испраќа болката од ударот.
Дијагнозата од специјалист е клучна за успешно лекување. Освен што го намалува квалитетот на животот, главоболката може да биде знак дека страдате од нешто или дека ви треба промена во вашиот животен стил. За успешно лекување на главоболката која трае одредено време, е силна и се повторува, неопходно е да се посети лекар специјалист кој ќе утврди дали ви се потребни дополнителни испитувања.