Американската актерка Хали Бери (57) првпат се појави во филмот „Икс-мен“ во улогата на Сторм пред 24 години, по што почна да ниже успех по успех.
Таа доживеа светска слава со улогата на жена-мачка во филмот „Жена-мачка“ („Catwoman“), а ја доби и престижната филмска награда Оскар за својата актерска умешност во „Бал на монструми“ („Monster’s Ball“).
Нејзината кариера трае до ден-денес, а Бери е меѓу најплатените актерки во Холивуд.
Во моментов, таа го промовира новиот филм „Унијата“ („The Union“) со нејзиниот колега Марк Волберг, а за време на интервјуто објавено од Нетфликс изјави дека во текот на долгата кариера претрпела бројни повреди.
„Трипати бев нокаутирана. Ја скршив раката, двапати ги скршив ребрата – првиот пат две ребра, вториот пат три ребра. Ја скршив крсната коска, два прста на нозете и еден прст на раката”, рече таа, покажувајќи дека го скршила средниот прст на раката.
Бери зборуваше и за тоа кои боречки вештини морала да ги научи за потребите на снимањето.
„Научив џиу-џицу, малку мај-тај, кикбокс, таеквондо и научив како да пукам“, рече таа.