Сите знаеме дека жените се менуваат на многу начини кога ќе станат мајки. Тоа е некако логично, очекувано и не обрнуваме многу внимание, освен што им се восхитуваме на мајките бидејќи понекогаш оваа промена е толку очигледна и ни се чини дека жените се уште поубави кога ќе станат мајки. Но, што е со татковците? И тие се менуваат, и како! Само таа промена понекогаш е малку помалку очигледна…
Нивното ниво на тестостерон може да се намали
Високото ниво на тестостерон кај мажите е делумно одговорно за однесувањата како што се агресијата и натпреварувачкиот дух. Меѓутоа, кога мажот ќе стане татко, се чини дека неговите нивоа на тестостерон се намалуваат, што сугерира дека сега целото внимание на мажот треба да биде насочено кон семејството, а не кон надвор.
Студиите сугерираат дека мажите кои веќе имаат партнер и оние кои имаат деца имаат пониско ниво на тестостерон во споредба со мажите без деца и оние кои сè уште бараат партнер. Изгледа дека со текот на времето машките тела научиле како да го намалат нивото на тестостерон за да ги променат приоритетите на мажите и да ги „претворат“ во посветени татковци.
Нивото на окситоцин и допамин се зголемува
Окситоцинот и допаминот се две хемикалии кои се одговорни за врската помеѓу родителот и детето. Додека нивото на тестостерон се намалува, позитивните ефекти на окситоцинот и допаминот се зголемуваат, што го поттикнува новопечениот татко што повеќе да ужива во играњето и гушкањето со своето бебе.
Хормоналните подеми и падови може да доведат до машка постнатална депресија
Иако многумина од нас знаат што е постпородилна депресија кај жените, малку луѓе слушнале нешто за постпородилна депресија кај мажите. Покрај другите функции, тестостеронот исто така игра голема улога во заштитата од лоши чувства и тага, а кога неговото ниво ќе се намали, младите татковци можат да станат склони кон депресија.
Некои студии, исто така, забележале промени во мозокот на мажите
Научниците ја проучувале мозочната активност на група новопечени татковци и се покажало дека во првите четири месеци по породувањето, нивниот мозок покажал некои забележливи промени во сивата материја. Овие промени им помагаат на новите татковци да ги развијат своите родителски вештини и да создадат силна врска со своето дете.
Поточно, мозокот на новиот татко може да покаже поголема активност во областите одговорни за планирање, решавање проблеми и откривање на ризик, со други зборови, областите кои им помагаат на татковците да го задржат своето дете безбедно и здраво.
Мажите дури можат да развијат симптоми на бременост кога нивната партнерка е бремена
Некои мажи може да доживеат и симптоми поврзани со бременоста како гадење, промени во апетитот, надуеност и болки во грбот во исто време кога нивната партнерка е бремена. Овој феномен се нарекува симпатeтична бременост или кувада. Оваа состојба не е официјално признаена како медицинска состојба, но овие симптоми можат да бидат вообичаени за идните татковци.