Кон крајот на август во Белград започнаа подготовките за уривање на познатиот хотел на Дунав. Хотелот Југославија, дизајниран од архитектот Лавослав Хорват, бил отворен во 1969 година, а изградбата наводно започнала откако етиопскиот император Хаиле Селасие му се пожалил на Тито дека на Белград му недостасува луксузно сместување.
Хотелот, кој во првичната верзија требаше да го носи името на градот во кој се наоѓа, сепак го доби името на Југославија, како што доликува на најголемиот хотел во земјата и околината. Неговата улога, освен самото сместување, беше да ја покаже силата и моќта на поранешната република. Кралицата Елизабета Втора, Ричард Никсон, Џими Картер, Нил Армстронг и Тина Тарнер се само дел од познатите имиња кои отседнале таму.
Нов луксузен комплекс
Белградскиот гигант на седум ката може да се пофали со 1.500 соби и 1.100 кревети во 200 еднокреветни и 400 двокреветни соби и 23 апартмани, како и ресторан со 600 седишта.
И додека култниот хотел на Тито ги одбројува своите последни денови, а фонтаната пред него деновиве се отстранува, единствено што ќе остане од него е лустерот кој влезе во Гинисовата книга на рекорди. До 2010 година, 14-тонскиот лустер во хотелот беше најголемиот во светот; бил украсен со дури 40.000 Сваровски кристали и 5.000 светилки.
Како што е најавено, на локацијата на хотелот се очекува да биде сместен ексклузивен мултифункционален комплекс на компанијата MV Investment, кој ќе содржи станбен и деловен простор, како и хотел со ресторани и бројни содржини.
