Принцезата Кејт Мидлтон (42) неочекувано се појави покрај својот сопруг, принцот Вилијам (42) во Саутпорт, Англија. Кралскиот пар таму се сретна со ожалостените семејства на трите девојчиња кои беа избодени до смрт од Аксел Муганва Рудакубан на час по танц во јули.
Ова е прв официјален јавен ангажман на принцезата откако заврши со хемотерапија, пишува Би-би-си. Кралските извори велат дека таа одлучила да му се придружи на принцот Вилијам за да покаже „поддршка, емпатија и сочувство за локалната заедница“.
Кралската посета на Саутпорт беше планирана како скромен настан, поминувајќи време со семејствата и наставникот по танц кој бил присутен за време на нападот.
Но, Кејт изненади многумина бидејќи оваа година се појави во јавноста само неколку пати, откако откри дека ѝ е дијагностициран рак. Откако завршила нејзината хемотерапија, таа почна постепено да се враќа на работните ангажмани.