Неодоливиот поглед на нашите миленици им дава еден вид супермоќ што со задоволство го користат за да добијат нешто што го замислиле.
Но, додека повеќето луѓе мислат дека „кучешкиот поглед“ го развиле кучињата за да ги задоволи луѓето, се чини дека тоа не е така.
Истражувањето објавено во списанието „The Anatomical Record“ го побива верувањето дека „кучешкиот поглед“ е производ на припитомување на кучињата. Тоа, исто така ја побива студијата од 2019 година, според која кучињата развиле високо експресивни лица поради нивната долга историја со луѓето, пренесува Live Science.
Споменатото истражување од 2019 година тврдеше дека домашните кучиња имаат развиено мускули околу очите многу повеќе од нивните диви предци, волците, и затоа можат да покажат повеќе изрази на лицето.
Научниците заклучиле дека кучињата ги развиле овие мускули затоа што живееле во близина на луѓе и имале потреба да ги имитираат нивните изрази на лицето.
„Бевме љубопитни да откриеме дали ова е вистина или дали овие мускули постојат и кај други високо социјални каниди (лат. Canidae)“, рече Хедер Смит од Универзитетот Мидзапад во Илиноис, главен автор на новиот труд.
Со цел подобро и потемелно да истражат за што се работи, Смит и нејзиниот тим извршија детална дисекција на починат примерок на африканско диво куче (лат. Licaon pictus) што го донираше зоолошката градина. Научниците открија дека африканските диви кучиња не само што имаат исти мускули на очите како домашните кучиња, туку и овие мускули се подеднакво развиени.
Ова откритие всушност го отфрли претходниот заклучок дека мускулите се развиени кај кучињата кои сакале да се зближат со луѓето. Се верува дека еволуирале за да им помогнат на дивите кучиња да се координираат и да комуницираат додека ловат на отворената савана.
Како волците и нивните домашни братучеди, африканските диви кучиња се многу социјални. Живеат во групи од околу пет до девет единки, а нивните исклучително експресивни лица им овозможуваат да даваат тивки визуелни сигнали на другите единки од нивниот вид, што им овозможува поуспешно да ловат.