Универзитетот Јејл следната година ќе воведе нов курс кој ќе ја проучува работата на поп-ѕвездата Бијонсе, која има рекордни 99 номинации за Греми и е препознаена како еден од највлијателните уметници во музичката историја.
Насловен „Бијонсе прави историја: радикална афро-американска традиција, култура, теорија и политика преку музика“, курсот ќе се фокусира на периодот од нејзиниот истоимениот албум од 2013 година до годинешниот „Каубој Картер“ и како светски познатата пејачка и текстописец создаде свест и ангажман во социјалните и политичките идеологии, објави ABC News.
Професорката по афроамерикански студии на Универзитетот Јеил, Дафне Брукс, планира да го искористи обемниот репертоар на пејачката, вклучувајќи снимки од нејзините настапи во живо, како „портал“ за студентите да учат за афроамериканските интелектуалци, од Фредерик Даглас до Тони Морисон.
– Ќе ги сфатиме сериозно начините на кои критичката работа, интелектуалната работа на некои од нашите најголеми мислители во американската култура е поврзана со музиката на Бијонсе и ќе размислуваме за начините на кои можеме да ја примениме нивната филозофија на нејзината работа – рече Брукс.
Бијонсе, чие полно име е Бијонсе Жизел Ноулс-Картер, не е првиот уметник што се изучува на универзитет.
Универзитетите ја проучуваа работата на кантавторот Боб Дилан, а неколку универзитети неодамна понудија часови за пејачката Тејлор Свифт и нејзините текстови и наследство во поп културата.