Мобилните телефони се дел од нашите животи секој ден, во наши раце во текот на денот, а повеќето луѓе ги држат телефоните блиску до себе дури и додека спијат. Дали е ова штетно за здравјето?
Д-р Неха Нарула од Медицинскиот факултет на Универзитетот Стенфорд верува дека зрачењето не е причина за загриженост кога се во прашање мобилните телефони, дури и ако спиете покрај него.
„Во моментов, нема докази за поддршка на тврдењето дека зрачењето од мобилните телефони или таблетите влијае на нашето здравје на долг рок“, изјави Нарула за Yahoo Life. Таа објасни дека зрачењето кое го испуштаат мобилните телефони е т.н. „нејонизирачко“ и различно од зрачењето за кое знаеме дека може да ја оштети ДНК.
„Зрачењето од мобилните телефони, микробрановите печки и слични уреди не покажува докази за долгорочни негативни здравствени ефекти“, рече Нарула. Меѓутоа, Меѓународната агенција за истражување на ракот истакнува дека нема цврсти докази дека тој не е штетен, пренесува Индекс.
Како користењето мобилни телефони влијае на спиењето?
Спиењето покрај мобилен телефон може да влијае на квалитетот на сонот бидејќи поттикнува употреба непосредно пред спиење. Истражувањата покажуваат дека луѓето кои ги користат своите телефони пред спиење имаат поголема веројатност да имаат послаб сон во споредба со оние кои ги оставиле час или два порано.
Светлината од мобилните телефони дополнително го нарушува деноноќниот ритам и го намалува производството на мелатонин, хормонот кој не прави поспани. Намалувањето на мелатонин негативно влијае на РЕМ фазата на спиење, клучна за емоциите и сеќавањата и може да го зголеми стресот и да доведе до здравствени проблеми.
Дали секој треба да го остави мобилниот телефон пред спиење?
Д-р Рафаел Пелајо, професор по медицина на спиење на Универзитетот Стенфорд, вели дека близината до мобилен телефон за време на спиењето може да има различни ефекти, во зависност од личноста. Луѓето со хронична несоница, на пример, може премногу да се разбудат од нивните мобилни телефони, што го влошува нивниот сон. Д-р Пелајо исто така наведува дека мобилниот телефон може да влијае на вашиот сон ако очекувате повик ноќе. Меѓутоа, во некои ситуации, мобилниот телефон може да обезбеди чувство на сигурност, особено ако живеете сами.